Коррупцияга қарши курашиш агентлиги давлат органлари билан алоқаларни янада мустаҳкамлаш мақсадида “9 декабрь — Халқаро коррупцияга қарши кураш” кунига бағишланган Антикоррупция ҳафталиги доирасида қатор ташкилотлар билан ҳамкорлик меморандумлари имзолашни режалаштирган. Шу каби тадбирларнинг бири жорий йилнинг 27 ноябрь куни бўлиб ўтди. Унда Агентлик ва Давлат солиқ қўмитаси ҳузуридаги Кадастр агентлиги ўртасида ҳамкорлик меморандуми имзоланди.

Учрашувда таъкидланганидек, Президент Шавкат Мирзиёевнинг 2020 йил 29 июндаги “Ўзбекистон Республикасида коррупцияга қарши курашиш тизимини такомиллаштириш бўйича қўшимча чора-тадбирлар тўғрисида”ги Фармонида Коррупциянинг олдини олиш ва унга қарши курашиш соҳасида давлат органлари, оммавий ахборот воситалари, фуқаролик жамияти институтлари ва бошқа нодавлат сектор вакилларининг биргаликдаги самарали фаолиятини таъминлаш Коррупцияга қарши курашиш агентлигининг асосий вазифаларидан бири этиб белгиланган.

Шу боисдан, Агентлик томонидан ўтган вақт давомида халқаро ташкилотлар, хорижий давлатларнинг юртимиздаги ваколатхоналари ҳамда қатор давлат, нодавлат муассасалар билан ҳамкорлик алоқалари ўрнатилди. 

Бундан ташқари, ҳозирда Агентлик ва Ҳисоб палатаси томонидан 26 та вазирлик ва идораларда яширин иқтисодиёт ва коррупцияга қарши мувофиқлик тизимини (“комплаенс-назорат”) жорий этиш ишлари давом эттирилмоқда. Жумладан, Давлат солиқ қўмитаси ҳузуридаги Кадастр агентлигида “комплаенс-назорат” хизмати ташкил қилинган кундан шу кунга қадар юридик ва жисмоний шахслар томонидан Кадастр агентлиги ходимларининг коррупцион ҳаракатлари устидан жами 65 та мурожаат ва шикоят хатлари келиб тушган. Мазкур мурожаатлар ўрганилиб, 23 нафар айбдор ходимларга нисбатан интизомий чоралар қўлланилган. Кўриниб турибдики, агентлик фаолиятида коррупцияга қарши курашиш тизимида қилинган ишлар билан бир қаторда амалга оширилиши лозим бўлган вазифалар етарлича.

Айни шу мақсадда тадбирда Коррупцияга қарши курашиш агентлиги ва Давлат солиқ қўмитаси ҳузуридаги Кадастр агентлиги ўртасида ҳамкорлик меморандуми имзоланди.

Мазкур меморандум доирасида:
- соҳада вужудга келаётган коррупция ҳолатларини биргаликда ўрганиш ва таҳлил этиш;
- ер ажратиш, кадастр соҳасидаги давлат хизматларни кўрсатиш, шу жумладан кўчмас мулк объектларига кадастр паспортини расмийлаштириш;
- кўчмас мулк объектларини давлат рўйхатидан ўтказиш ва давлат кадастрларини юритишда коррупцион омилларни бартараф этиш бўйича тегишли таклифларни ҳамкорликда ишлаб чиқиш;
- Кадастр агентлиги ходимлари ўртасида одоб-аҳлоқ қоидаларини ишлаб чиқиш ва унга амал қилинишига эришиш,
- ходимлар ўртасида коррупцияга тоқатсиз муносабатни ва унга қарши курашиш маданиятини шакллантириш мақсадида тегишли чораларни кўриш назарда тутилган.

Учрашув якунида ҳар икки муассаса раҳбарлари тизимдаги ўз ечимини кутаётган масалаларни ҳамкорликда бартараф этишга келишиб олдилар.