Жорий йилнинг 14 декабрь куни Коррупцияга қарши курашиш агентлиги ва Европа Иттифоқи (ЕИ) делегацияси ўртасида онлайн учрашув бўлиб ўтди.

Унда Ўзбекистон ва ЕИнинг 2021-2027 йиллар учун Ҳамкорлик дастурига коррупцияга қарши кураш йўналиши бўйича киритилиши режалаштирилаётган устувор масалалар муҳокама қилинди.

Йиғилишда сўзга чиққан Агентлик директори ўринбосари Умида Тухташева келгуси йилларда мамлакатимизнинг коррупцияга қарши курашиш соҳасидаги устувор йўналишлари ва уларни амалга оширишда Агентлик ҳамда ЕИнинг ҳамкорлиги масалалари тўғрисида маълумот бериб ўтди.

Жумладан, қонунчиликни такомиллаштириш, корррупцияга қарши курашишда узоқ муддатли стратегик дастурларни ишлаб чиқиш, Агентлик фаолиятини институционал ва ташкилий асосларини янада ривожлантириш, коррупцияга қарши курашишда қўлланиладиган халқаро тажриба, шу жумладан давлат органларида “комплаенс назорат” тизимини фаол жорий этиш, соҳага замонавий ахборот-коммуникация технологияларини қўллаш, фуқаролик жамияти институтларини жалб қилиш механизмларини ўрганиш ҳамда жамоатчиликда коррупцияга қарши тоқатсизлик муҳитини шакллантириш ҳамкорликнинг асосий йўналишлари сифатида кўриб чиқилди.

Ўз навбатида Европа Иттифоқининг Ўзбекистон билан ҳамкорлик масалалари сектори раҳбари Франсуа Бежо Ўзбекистонда коррупцияга қарши курашиш давлат сиёсати даражасига кўтарилганини эътироф этган ҳолда, Агентлик олдига қўйилган муҳим вазифаларни амалга оширилишида Европа Иттифоқи кўмак беришга тайёр эканлигини маълум қилди.