Коррупцияга қарши курашиш агентлиги директори Акмал Бурханов журналист ва блогерлар учун ташкил этилган халқаро семинарда иштирок этди. Семинар АҚШнинг глобал медиа Агентлиги (USAGM)томонидан ташкил этилди.

USAGM – Америка Қўшма Штатлари ҳукуматининг мустақил агентлиги бўлиб, унинг таркибига «Америка овози», «Озод Европа/Радио Озодлик» радиоси (RFE/RL) ва бошқа радиоэшиттириш тузилмалари киради.

Очиқ мулоқот тарзида ташкил этилган учрашувда агентлик директори агентлик фаолияти, ҳозирда амалга оширилаётган ишлар, кенг жамоатчилик, айниқса журналистлар билан ҳамкорлик алоқаларини мустаҳкамлаш бўйича режаларини маълум қилди.  

Ўз навбатида журналист ва блогерлар томонидан ҳам айни кунларда учраётган коррупцион ҳолатлар, коррупцияга қарши курашда оммавий ахборот воситаларининг ўрни, коррупцияни келтириб чиқараётган омиллар ва уларни бартараф этиш бўйича агентликнинг позицияси тўғрисида бир қатор саволлар берилди.

Аҳамиятлиси, ҳар бир масала қизғин муҳокамага айланиб кетди ва ҳар бир иштирокчи мавзу юзасидан ўз фикрини эркин баён этди.

Семинар якунида иштирокчилар бу каби учрашувлар ва унда ўртага ташланган таклифлар, тавсиялар ҳар икки томон учун ҳам фойдали бўлганлигини эътироф этишди.