Жорий йилнинг 18 январь куни Ўзбекистон Республикаси Президентининг “2017–2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини “Ёшларни қўллаб-қувватлаш ва аҳоли саломатлигини мустаҳкамлаш йили”да амалга оширишга оид давлат дастури тўғрисида”ги фармони лойиҳаси жамоатчилик муҳокамасига тақдим этилди.

Ҳужжат лойиҳаси 2020 йилнинг 29 декабрь куни Ўзбекистон Республикаси Президенти томонидан Олий Мажлис палаталарига тақдим этилган Мурожаатномада белгилаб берилган асосий вазифалардан келиб чиқиб ишлаб тайёрланган.

Унда, хусусан, коррупциянинг олдини олиш ва унга қарши курашиш соҳасида амалга ошириш лозим бўлган бир қатор муҳим чора-тадбирлар ҳам ўрин олган.

Жумладан, Коррупцияга қарши курашиш агентлиги томонидан очиқ
эълон қилиниши лозим бўлган маълумотлар рўйхатини кенгайтириш,
шу жумладан давлат харидлари ва инвестиция лойиҳалари доирасида ҳамда рухсат этиш хусусиятига эга хужжатларни бериш бўйича ташкил этиладиган тендер ва танлов комиссияларининг таркиби, давлат активларининг олди-сотди жараёни иштирокчилари, давлат-хусусий шериклик иштирокчилари, солиқ ва бошқа имтиёзлар олувчилар каби маълумотларни очиқ эълон қилиш бўйича таклифлар ишлаб чиқилади.

Бундан ташқари, Коррупцияга қарши курашиш тизимини янада такомиллаштириш мақсадида Коррупцияга қарши курашиш бўйича 2021–2025 йилларга мўлжалланган миллий стратегия ишлаб чиқилиши белгиланган. Миллий стратегияда:

• аниқ индикаторларни ўзида акс этирувчи коррупцияга қарши курашишнинг асосий йўналишлари белгилаш ва чора-тадбирлар режасини ишлаб чиқиш;
• Коррупцияга қарши курашиш агентлиги фаолияти ҳуқуқий асосларини такомиллаштириш;
• коррупцияга қарши ички назорат тизими (“комплаенс-назорат”) ҳуқуқий асосларини яратиш ҳамда коррупцияга қарши курашишнинг воситаларини такомиллаштириш назарда тутилади.

Шунингдек, давлат фуқаролик хизматида кадрларни танлаш, уларнинг малакасини ошириш ва фаолиятини баҳолаш бўйича самарали ва очиқ тизим жорий этилади. Бунинг учун Ўзбекистон Республикаси Президенти қарори лойиҳаси ишлаб чиқилиб, унда:

• кадрларни танлаш ва ишга қабул қилишда уларнинг интеллектуал салоҳиятини, маънавий фазилатларини баҳолайдиган очиқ ва ошкора тизимни жорий қилиш;
• коррупциянинг олдини олиш бўйича давлат хизматчиларини мунтазам ўқитиш ва билимини баҳолаб бориш тизимини жорий этиш;
• вазирлар ва уларнинг ўринбосарлари фаолиятини жойларда, шу жумладан маҳаллаларда амалда қандай ўзгариш бўлганига қараб баҳолаб бориш тизимини йўлга қўйиш назарда тутилади.

2021 йил Давлат дастури лойиҳасида Давлат органларида очиқлик ва ошкораликни таъминлаш механизмларини янада такомиллаштириш таклиф этилмоқда. Унга кўра:

• очиқ эълон қилиниши лозим бўлган маълумотлар рўйхати кенгайтирилади;
• давлат ҳокимияти ва бошқаруви органлари очиқлиги концепцияси ишлаб чиқилади;
• ҳар йил якунлари бўйича давлат ҳокимияти ва бошқаруви органларининг Очиқлик индекси аниқланади;
• “Очиқ ва ҳисобдор ҳукумат” ғоясини амалга оширишга қаратилган амалий чоралар кўриш назарда тутилади.

Шу билан бирга Агентликка Бош прокуратура ва Адлия вазирлиги билан биргаликда “Е-Антикоррупция” лойиҳасини амалга ошириш механизмлари ҳамда коррупцияга мойил бўлган муносабатларни бартараф этиш бўйича комплекс чора-тадбирлар дастурини назарда тутувчи Ўзбекистон Республикаси Президенти қарори лойиҳасини ишлаб чиқиш юклатилмоқда. Унга кўра:

• давлат органлари ва ташкилотлари ўз фаолият йўналишларида мавжуд коррупциоген омилларни бартараф этиш бўйича таклифларни доимий равишда Коррупцияга қарши курашиш агентлигига киритиш;
• давлат органлари ва ташкилотлари томонидан киритилган таклифларни кўриб чиқиш, соҳа ва тармоқлар кесимида чуқур таҳлиллар ва жамоатчилик сўровларини ўтказиш натижасида “Коррупцияга мойил бўлган муносабатлар электрон реестри”ни шакллантириш;
• “Коррупцияга мойил бўлган муносабатлар электрон реестри”га мувофиқ ҳар бир коррупциявий омилни биринчи навбатда рақамлаштириш (электрон навбат, аукцион ва бошқа замонавий усуллар), очиқликни таъминлаш, жамоатчилик назорати каби воситалар орқали бартараф этиш бўйича таклифларни экспертлар ва фуқаролик жамияти институтлари вакиллари орасида кенг муҳокамадан ўтказган ҳолда ишлаб чиқиш;
• амалга оширилаётган чора-тадбирларнинг натижадорлигини ва коррупциявий омилларни бартараф этишга таъсирини жамоатчилик фикрини ўрганган ҳолда баҳолаш ва эълон қилиш.

Коррупцияга қарши курашиш агентлиги барча фуқароларни мазкур муҳим ҳужжат муҳокамасида фаол иштирок этишларини, шу жумладан, коррупцияга қарши курашиш ва унинг олдини олиш бўйича белгиланган чора-тадбирлар бўйича ўз фикр-мулоҳазаларнии билдиришга ҳамда бошқа янги таклифларни тақдим этишга чорлайди.

Жамоатчилик муҳокамаларида иштирок этинг, фикр ва таклифларингизни билдиринг: jamoatchilik.uz