Аввал хабар берганимиздек, Коррупцияга қарши курашиш агентлиги вакиллари ҳудудларда ички ишлар органларидаги коррупцион ҳуқуқбузарликларни келтириб чиқараётган омилларни аниқлаш ва коррупцияга қарши курашиш тўғрисидаги қонун ҳужжатларига риоя этилиши ҳолатини ўрганмоқда.
Жумладан, жорий йилнинг 23 февраль куни Ўзбекистон Республикаси Коррупцияга қарши курашиш агентлиги директори А. Бурханов ва агентлик ходимлари томонидан Хоразм вилоятида ҳам ўрганишлар ўтказилди.

Хусусан, Урганч шаҳри ва туманидаги маҳалла фуқаролар йиғинига ташриф буюрган ҳолда ички ишлар органларининг мурожаатлар билан бевосита шуғулланувчи соҳавий йўналишлари кундалик хизмат фаолияти ўрганилди. 

Навбатдаги ташриф манзиллардан бири  - вилоят ИИБ Йўл ҳаракати хавфсизлиги бошқармаси ва Шовот туманидаги 2-сон туманлараро рўйхатдан ўтказиш ва имтиҳон олиш бўлими бўлди.

Ички ишлар органларининг йул харакати хавфсизлиги соҳа фаолияти сўнгги йилларда бир қатор ислоҳотлар олиб борилаётганлиги, хусусан давлат рақам белгиларини электрон кимошди савдолари орқали сотилиши йўлга қўйилганлиги, ЙПХ инспекторларининг бодикамера ва планшетлар билан тўлиқ таъминланганлиги, имтиҳон қабул қилиш хоналарига кузатув камералари ўрнатилганлиги аниқланди. Шу билан биргаликда, келгусида Урганч шаҳри ва туманлар марказидаги чорраҳаларга йўл ҳаракати қоидаларини қайд этувчи камераларни ўрнатиш орқали ЙПХ инспекторларининг ҳайдовчилар билан мулоқотда бўлишларини имкон қадар қисқартириш тавсия қилинди.

Бундан ташқари Агентлик ходимлари томонидан вилоят ички ишлар органларида коррупцион ҳуқуқбузарликларни келтириб чиқараётган омилларни аниқлаш ва коррупцияга қарши курашиш тўғрисидаги қонун ҳужжатларига риоя этилиши ҳолатини ўрганиш мақсадида сўровнома ҳам ўтказилди.