2021-yil 24-iyul kuni O‘zbekiston Respublikasi Prezidentining elektron onlayn-auksionni tashkil etish va o‘tkazish tartibini soddalashtirish hamda unifikatsiya qilish, jarayonlarning ochiqligi va shaffofligini oshirish, ishtirokchilar huquqlarini ishonchli himoya qilish, shuningdek, aholining auksionda qatnashishi uchun qulayliklar yaratishga qaratilgan Qarori qabul qilindi.

Unga muvofiq, 

➖2021-yil 1-sentyabrdan boshlab “E-auksion” elektron savdo platformasida (“E-ijro auksion” yagona elektron savdo maydonchasi “E-auksion” elektron savdo platformasi deb qayta nomlanmoqda) ishtirokchilarga, shu jumladan, chet el fuqarolariga auksionda qatnashish uchun elektron raqamli imzo kaliti sertifikati masofadan turib, bepul taqdim qilinadi;

➖jismoniy va yuridik shaxslar tomonidan obyektlarni auksionga chiqarish uchun to‘lanadigan yig‘im bekor qilinadi;

➖auksion o‘tkazish to‘g‘risidagi xabar u o‘tkaziladigan kundan 30 kun oldin eʼlon qilinadi;

➖auksion g‘olibi to‘lovlarni to‘lashdan bosh tortgan taqdirda, g‘olib hamda uning to‘g‘ridan-to‘g‘ri taʼsischilari hisoblangan shaxslar nohalol ishtirokchi sifatida elektron savdo platformasidagi auksionlardan chetlatiladi;

➖auksionga chiqarilgan obyektlarni sotishga faqat auksionda kamida ikkita ishtirokchi qatnashganda ruxsat beriladi;

➖Davlat ishtirokidagi korxonalar tomonidan ko‘chmas mulklari, avtomototransport vositalari hamda boshqa asosiy vositalarini ijaraga berish yoki ularni realizatsiya qilish hamda elektron onlayn-auksion natijalari to‘g‘risidagi maʼlumotlar o‘zlarining rasmiy veb-saytlariga joylashtiriladi;

➖Yer uchastkalarini auksionga investitsiya kiritish sharti bilan chiqarish tartibi bekor qilinadi;

➖2021-yil 1-avgustga qadar elektron savdo platformasida auksionda ishtirok etuvchilar soni, shuningdek, auksion jarayonini onlayn rejimda kuzatib borish joriy etiladi;

➖Obyektlar, shu jumladan, yer uchastkalarini elektron onlayn-auksionda sotib olib, qisqa muddat davomida undan foydalanmagan holda ularning oldi-sotdisi bilan shug‘ullanayotgan yuridik va jismoniy shaxslarni aniqlab, savdolardan chetlatish choralari ko‘riladi.