Маълумки, сўнгги пайтларда коррупцияга қарши муросасиз муҳит аҳоли орасида кучайиб бормоқда ва бу ўз ўрнида коррупция билан боғлиқ ҳолатларнинг очиқланишига ва ҳуқуқни муҳофаза қилувчи органлар томонидан тегишли тартибда чора кўрилишига асос бўлмоқда.

Хусусан, коррупцияга қарши курашиш агентлигига ҳам қатор коррупциявий ҳолатлар бўйича мурожаатлар келиб тушиб, улар тегишли органлар билан ҳамкорликда бартараф этилмоқда.

Шунингдек, ижтимоий тармоқларда кенг муҳокамаларга сабаб бўлаётган айрим мавзулар юзасидан ўрганишлар олиб борилаётганлигини маълум қиламиз.

Жумладан, Президентнинг Тошкент вилоятига амалий сафари пайтида берган топшириғига асосан Қишлоқ хўжалиги вазирлиги ҳузуридаги Қишлоқ хўжалигида билим ва инновациялар миллий маркази томонидан 10 миллиард сўмга 1 млн дона узум кўчати харид қилиш мақсадида эълон қилинган тендерда “DE NOVA AGRO” МЧЖ ғолиб бўлгани, буюртмачи (марказ)нинг раҳбари Тўраев Алишер Мелсович ҳамда тендер ғолиби деб топилган корхона “DE NOVA AGRO” МЧЖ раҳбари (2021 йил 20 сентябрга қадар раҳбар бўлган) Тўраева Анаис Алишеровна қариндош эканлиги ва ушбу ҳолатда манфаатлар тўқнашуви бўлиши мумкинлиги айтилган ва мутасадди идоралар томонидан эътибор қаратиш сўралган.

Давлат тиббий суғуртаси жамғармаси томонидан жамғарманинг ижро этувчи директори учун 399 млн. сўмга бир дона Skoda Kodiaq русумли автомобиль харид қилингани, бундан аввал, жамғарма томонидан 369 млн. сўмга бир дона Malibu-2 ва 276 млн. сўмга икки дона LACETTI L-ELEGANT русумли автомобиллар харид қилингани, шунингдек мазкур жамғармани ташкил этилганидан то бугунги кунга қадар бўлган харидларига назар ташланганда, асосан интернет хизматлари учун тўловларни амалга оширгани, автомобиллар харид қилган ва шу автомобилларнинг ёнилғиси учун маблағ сарфлагани танқид қилинган.

Асака тумани бюджетини сарфлаш бўйича жамоатчилик фикри асосида шаклланадиган ва халқ депутатлари кенгаши томонидан тасдиқланган, 10,3 млрд сўмни ташкил этган харажатлар руйхатида бўлмаган тумандаги 55-сайлов участкаси этиб белгиланган мактабнинг том қисмини таъмирлашга маблағ йўналтирилгани, ишлар мактабнинг том қисмини очиб, эски материалларни қайта ёпиш билан тугаллангани шунингдек, кенгаш томонидан тасдиқланган рўйхатда бўлган, иситиш тизимини капитал таъмирлаш учун 970 млн сўм сарфланиши режалаштирилган 30-сонли умумтаълим мактабининг иситиш тизими 2 йил олдин ўрнатилгани ва бир мавсум фойдаланишда бўлгани айтилган ҳамда бюджет маблағларини асосли ва ўринли сарфлашда ҳуқуқни муҳофаза қилувчи органларнинг эътибор қаратиши сўралган.

Бу каби жамоатчиликнинг кенг муҳокамасига сабаб бўлаётган ҳолатларга аниқлик киритиш ва зарур ҳолларда Агентлик томонидан тегишли давлат органларига тақдимномалар юборилиши юзасидан чоралар кўрилмоқда.