Маълумки, Коррупцияга қарши курашиш агентлиги давлат ва хўжалик бошқаруви органлари, устав капиталида давлат улуши бўлган корхоналар, шу жумладан, банкларда коррупцияга қарши ички назорат тизимини жорий этиш ва уларнинг самарали фаолият кўрсатишини таъминлаш вазифасини амалга ошириб келмоқда.

Шунингдек, Президентнинг 2021 йил 6 июлдаги “Коррупцияга қарши курашиш фаолиятини самарали ташкил этишга доир қўшимча чора-тадбирлар тўғрисида”ги қарорига мувофиқ, жорий йил 1 октябридан бошлаб, барча давлат органлари
ва ташкилотлари, вилоят ҳокимликларида коррупцияга қарши ички назорат тузилмаларини жорий этиш белгиланган эди.

Шунга мувофиқ, Агентлик томонидан вазирлик ва идораларда мазкур тизим фаолиятини йўлга қўйиш жараёнлари ўрганилганда қатор муаммолар, турли саволлар, тушунмовчиликлар юзага келаётгани кузатилди. Бу эса тузилма фаолиятини тўғри ва самарали ташкил этиш учун амалий-методик воситалар яратишни тақозо этди. Шундан келиб чиқиб, Агентлик томонидан Коррупцияга қарши ички назорат (комплаенс) тизимини жорий этиш бўйича қўлланма тайёрланди. 

У ўз йўналишида ўзбек тилида чоп этилган илк  методологик ҳужжат саналади. Унда “комплаенс-назорат” тизимининг ривожланиш тарихи, жорий этиш босқичлари, соҳадаги муҳим халқаро стандартлар ва миллий қонунчилик асослари, ички назорат тузилмаларининг асосий вазифалари, ҳуқуқ ва мажбуриятлари батафсил акс этган.

 Шунингдек, қўлланма ходимларни ишга қабул қилиш, ташкилотни ISO-37001 – “Корррупцияга қарши бошқарув менежменти” халқаро стандартига мувофиқ сертификатлаштириш каби масалалар бўйича зарур тавсия ва маълумотлар билан бойитилган. Коррупцияга қарши ички назорат (комплаенс) тизими фаолияти билан боғлиқ энг кўп бериладиган саволларга ҳам батафсил жавоблар жамланган, уларда хорижий ва миллий асослар баён этилган. 

Бугунги кунда мазкур методологик ҳужжат республика бўйлаб барча давлат ташкилотлари, идоралар ҳамда коррупцияга қарши ички назорат тузилмалари ходимларига етказилмоқда.