Surxondaryo viloyat Korrupsiyaga qarshi kurashish hududiy kengashining bugun boʻlib oʻtgan yigʻilishida shu haqda soʻz yuritildi. 

Taʼkidlanganidek, xalq taʼlimi tizimi viloyatda eng korrupsiyalashgan sohalardan biri boʻlib turibdi. 

Birgina 2021-yilda tizimda faoliyat yuritgan 27 nafar shaxsga nisbatan 19 ta jinoyat ishi sudga yuborilgan. Xususan, ular tomonidan oʻzlashtirish yoki rastrata yoʻli bilan talon-toroj qilish, firibgarlik, pora olish kabi jinoyatlar sodir etilgan. Mazkur jinoyatlarga qoʻl urganlarning barchasi tuman va shahar miqyosidagi xalq taʼlimi boʻlimlarining xodimlari hisoblanadi.

Buning sabablari va ularni bartaraf etish yuzasidan takliflar Korrupsiyaga qarshi kurashish agentligi rahbariyati, Milliy kengash aʼzolari, mutasaddi vazirlik va idoralar vakillari hamda Hududiy kengash aʼzolari ishtirokida ochiq muhokama qilindi. Jumladan, bu borada viloyat prokurori hamda xalq taʼlimi tizimi masʼullarining axboroti eshitildi. 

Muhokamalar jarayonida viloyatda boshqa sohalardagi korrupsion jinoyatlar tahliliga ham eʼtibor qaratildi. Bu bejiz emas - Korrupsiyaga qarshi kurashish agentligi tomonidan har oyda hududlar va sohalar kesimida yuritib kelinayotgan korrupsiya darajasini reyting baholash natijasiga koʻra, Surxondaryo viloyatida korrupsiyaga oid jinoyatlarning soni har oyda ortib borayotganligi tendensiyasi kuzatilmoqda. 

Jumladan, joriy yilning fevral oyida 18 ta korrupsiyaviy jinoyat sodir etilgan boʻlsa, mart oyida bu raqam qariyb ikki barobarga oshib, 32 tani tashkil etgan  va bu koʻrsatkich bilan viloyat mart oyida eng koʻp korrupsiyaviy jinoyat sodir etilgan 5 ta hududdan biri boʻlgan.

Shuningdek, fevral oyi reyting natijalarida viloyatda byudjet mablagʻlaridan noqonuniy foydalanish holatlari boʻyicha 16 ta nazorat obyektida 6 mlrd. 11 mln. soʻm mablagʻlarning maqsadsiz sarflanishi bilan bogʻliq holatlar aniqlangan. Natijada mazkur yoʻnalishda viloyat respublikada 2-oʻrinni egallagan.

Ishtirokchilar bu kabi qonunbuzilish holatlarining kelib chiqish sabablari va ularni bartaraf etish yoʻllari yuzasidan oʻzaro fikr almashishdi.  

Muhokamalar yakunida  xalq taʼlimi tizimini korrupsiyadan xoli qilish hamda Hududiy kengash faoliyatini takomillashtirish boʻyicha koʻrilishi lozim boʻlgan aniq, taʼsirchan choralar belgilab olindi.  

Korrupsiyaga qarshi kurashish agentligi

Axborot xizmati