Korrupsiyaga qarshi kurashish agentligi tomonidan byudjet buyurtmachilarining maxsus axborot portallari orqali amalga oshirayotgan davlat xaridlariga oid e’lonlari monitoring tartibida o‘rganilmoqda.

O‘rganishlarda ayrim davlat buyurtmachilari tomonidan davlat xaridlarini amalga oshirishda qonunbuzilish holatlariga yo‘l qo‘yilayotganligi aniqlanmoqda.

Xususan, joriy yil sentyabr oyida Agentlik tomonidan buyurtmachilarga aniqlangan jami 10,4 mlrd. so‘mlik qonunbuzilishlarni bartaraf qilish hamda kelgusida shu kabi holatlarga yo‘l qo‘ymaslik haqida 26 ta taqdimnomalar kiritilgan.

Hozirda jami kiritilgan 26 ta taqdimnomalardan 23 tasi bo‘yicha xarid natijalari bekor qilinib, tegishli chora-tadbirlar belgilab olingan. 

Jumladan, Farg‘ona issiqlik elektr markazi aksiyadorlik jamiyati buyurtmachiligida maxsus axborot portaliga joylashtirilgan 801 mln. so‘mlik “Yoshlar forumini o‘tkazish” yuzasidan e’lon bo‘yicha davlat xaridiga oid hujjat va ma’lumotlar o‘rganilganida, mazkur davlat xaridida o‘zaro affillangan shaxslarga tegishli tadbirkorlik subyektlari ishtirok etib, g‘oliblikni qo‘lga kiritganligi ma'lum bo'ldi.

Shu kabi, Angren shahar obodonlashtirish boshqarmasi buyurtmachiligida maxsus axborot portaliga joylashtirilgan 1,0 mlrd. so‘mlik “Tungi yoritish chiroqlarini o‘rnatish xizmati” yuzasidan e’lon bo‘yicha davlat xaridida ham o‘zaro affillangan shaxslarga tegishli tadbirkorlik subyektlari ishtirok etib, g‘oliblikni qo‘lga kiritgan.

Biroq, har ikki holatda ham xarid komissiyasi tomonidan o‘zaro affillangan shaxslar xarid qilish tartib-taomillarida ishtirok etishdan chetlatilmasdan O‘zbekiston Respublikasi “Davlat xaridlari to‘g‘risida”gi Qonunning 42-moddasi va “Raqobat to‘g‘risida”gi Qonunining 14-moddasi talablari buzilganligi aniqlanib, buyurtmachi va yuqori tashkilotga xarid natijasini bekor qilish va kelgusida shu kabi qonunbuzilish holatlariga yo‘l qo‘ymaslik yuzasidan tegishli chora-tadbirlarni belgilash haqida taqdimnomalar kiritildi. 

Toshkent viloyati hokimligi hamda Issiqlik elektr stansiyalari AJlarining javob xatlariga ko‘ra, buyurtmachilar tomonidan xarid natijalari bekor qilinib, kelgusida shu kabi qonunbuzilish holatlariga yo‘l qo‘ymaslik bo'yicha tegishli chora-tadbirlar belgilab olindi. 

Shuningdek, ushbu holatlar yuzasidan to‘plangan hujjatlar huquqiy baho berish uchun Bosh prokuraturaga yuborildi. 

Korrupsiyaga qarshi kurashish agentligi

Axborot xizmati