Korrupsiyaga qarshi kurashish agentligi vakillari joriy yilning sentabr oyida Surxondaryo, Qashqadaryo va Buxoro viloyatlarida bo‘lib, hududlarda korrupsiyaning tarqalganlik hamda uni his qilish darajasi,  korrupsiyaga oid murojaatlar va ularni qanoatlantirish holati, sodir etilgan korrupsiyaviy jinoyatlarning aholi turmush tarziga va jamiyatga ko‘rsatayotgan salbiy ta’siri, ijtimoiy so‘rovlar orqali fuqarolarning korrupsiyaga duch kelganligi va boshqa shu kabi munosabatlar joyiga chiqqan holda o‘rganildi.

Qayd etilgan viloyatlarda ayrim mansabdor shaxslar tomonidan davlat xaridlari to‘g‘risidagi qonunchilik muntazam ravishda buzilayotgani, manfaatlar to‘qnashuvi va qarindosh-urug‘chilikka yo‘l qo‘yilayotgani, ayrim hokim va o‘rinbosarlarining tadbirkorlik subyektlari ta’sischisi ekanligi, imtiyozli kreditlar ajratishda ayrim hokim yordamchilarining ta’minotchi tadbirkorlik subyektlarining rahbar va ta’sischisi hisoblanishi, ochiq tanlovsiz davlat xizmatiga ishga qabul qilish hamda bo‘sh ish o‘rinlarini yashirish holatlari aniqlandi.

Mavjud qonunbuzilishi holatlari bo‘yicha to‘plangan hujjatlar qonuniy baho berish uchun prokuratura organlariga yuborildi. 

Shuningdek, Agentlik vakillari tomonidan Qashqadaryo hamda Surxondaryo viloyatlarida “Yoshlar-kelajagimiz” davlat dasturi bo‘yicha o‘tkazilgan o‘rganishlarda loyihalar davlat-xususiy sheriklik asosida amalga oshirilmaganligi, tadbirkorlar tomonidan ish o‘rni yaratish va yoshlarni ish bilan ta’minlash majburiyatlari bajarilmaganligi, investitsiya kiritilmaganligi, yer uchastkasi ajratilganligiga 2-3 yildan ortiq muddat o‘tganiga qaramasdan, qurilish ishlari boshlanmaganligi va yer uchastkasini davlat zahirasiga qaytarish choralari ko‘rilmaganligi, ajratilgan yer maydonlarida boshqa obyektlar qurilganligi hamda ayrim holatlarda yer uchastkalari sotib yuborilganligi ma'lum bo'ldi. To‘plangan hujjatlar huquqiy baho berish uchun Bosh prokuraturaga yuborildi.

Korrupsiyaga qarshi kurashish agentligi

Axborot xizmati