Joriy yilning 15-noyabr kuni Korrupsiyaga qarshi kurashish agentligida “Davlat organlari va tashkilotlari faoliyati ochiqligini baholash mezonlari” mavzusida ikki kunlik seminar boshlandi.  

Unda 30 dan ortiq davlat organlari va tashkilotlarining ochiqlikni ta’minlashga mas’ul boʻlgan xodimlari ishtirok etmoqda.   

Mazkur tadbir Agentlik tomonidan davlat organlari va tashkilotlarining ochiqlikni ta’minlashga mas’ul boʻlgan xodimlarini ochiq ma’lumotlar siyosati va uni amalga oshirish mexanizmlari sohasidagi salohiyatini oshirish maqsadida amalga oshirib kelinayotgan ishlarning mantiqiy davomidir.

Ma’lumot uchun: Bugungi kunda Agentlik tomonidan davlat organlarida ochiqlikni ta’minlashga mas’ul boʻlgan xodimlarni muntazam oʻqitish tizimi yoʻlga qoʻyildi. Joriy yilning oʻzida davlat organlarining sohaga mas’ul xodimlarini oʻqitishga qaratilgan 10 ta seminar tashkil etilib, 200 dan ortiq davlat xizmatchilari oʻqitilishi ta’minlandi.

Bundan tashqari, doimiy ravishda davlat organlarining ochiqlikni ta’minlashga oid majburiyatlarga rioya etilishi masofaviy monitoring tartibida muntazam oʻrganilib, aniqlangan kamchiliklarni bartaraf qilish choralari koʻrilmoqda.

Tahlillar shuni koʻrsatmoqdaki, qator davlat organlari va tashkilotlarida ochiqlikni ta’minlash sohasidagi majburiyatlarga rioya etish tizimli yoʻlga qoʻyilmagan, ya’ni ma’lumotlarni e’lon qilish uchun mas’ullar, ularni e’lon qilish tartibi, muddatlari kabi masalalar aniq belgilanmagan. Buning natijasida esa rasmiy veb-saytlarda yoki Ochiq ma’lumotlar portalida ma’lumotlarni oʻz vaqtida e’lon qilmaslik yoki toʻliq ochiqlamaslik holatlari kuzatilmoqda.

Agentlik tomonidan bu kabi seminarlarni doimiy tashkil etish orqali yoʻl qoʻyilayotgan xato va kamchiliklar boʻyicha atroflicha tushuntirish, amaliy maslahat va tavsiyalar berib borilmoqda.

Ta’kidlaganidek, mamlakatimizda davlat organlari va tashkilotlari faoliyati jamoatchilik uchun ochiq va  shaffof boʻlishi, mansabdor shaxslarning esa xalq oldida hisobdorligi davlat rahbari darajasidagi qator normativ-huquqiy hujjatlar bilan belgilab qoʻyildi.

Jumladan, 2021-yil 16-iyunda davlatimiz rahbari tomonidan “Davlat organlari va tashkilotlarining faoliyati ochiqligini ta’minlash, shuningdek, jamoatchilik nazoratini samarali amalga oshirishga doir qoʻshimcha chora-tadbirlar toʻgʻrisida”gi Farmon bilan tasdiqlangan Ochiq ma’lumotlar sifatida joylashtirilishi kerak boʻlgan ijtimoiy ahamiyatga molik ma’lumotlarni oʻz vaqtida belgilangan аxborot resurslarida joylashtirib borilishi ustidan doimiy monitoring oʻtkazish tizimi yoʻlga qoʻyildi.

“Oʻzbekiston Respublikasining Ma’muriy javobgarlik toʻgʻrisidagi kodeksiga qoʻshimchalar kiritish haqida”gi Qonuni qabul qilindi. Unga muvofiq, Ma’muriy javobgarlik toʻgʻrisidagi kodeks 2157-modda bilan toʻldirilib, unda davlat hokimiyati va boshqaruv organlari faoliyatining ochiqligi toʻgʻrisidagi qonunchilikni buzganlik uchun javobgarlik belgilandi.

Agentlik tomonidan ishlab chiqilgan yana bir muhim hujjat — Oʻzbekiston Respublikasi Prezidentining 2022-yil 14-iyundagi “Davlat organlari va tashkilotlari faoliyatining ochiqlik darajasini oshirish va baholash tizimini joriy etish chora-tadbirlari toʻgʻrisida”gi PF-154-son Farmoni bilan davlat organlari va tashkilotlarida ochiqlik boʻyicha amalga oshirilayotgan ishlarning samaradorligi va natijadorligini baholashga qaratilgan Ochiqlik indeksi joriy etildi.

Ma’lumot uchun: Agentlik tomonidan yil yakunida davlat hokimiyati va boshqaruvi organlari, shuningdek, ustav fondida davlat ulushi 50 foiz va undan ortiq boʻlgan xoʻjalik jamiyatlari hamda davlat unitar korxonalarida ochiqlik boʻyicha amalga oshirilayotgan ishlarning samaradorligi va natijadorligini baholashga qaratilgan Ochiqlik indeksi e’lon qilinadi.

Ochiqlik indeksi davlat organlari va tashkilotlarining rasmiy veb-saytlarida axborotlarni joylashtirish va elektron davlat xizmatlari koʻrsatish holati, ijtimoiy ahamiyatga molik ma’lumotlarni qonunchilikda belgilangan axborot resurslarida e’lon qilish va jamoatchilik oldida hisobdorlik tizimining yoʻlga qoʻyilish kabi 8 ta indikatorlar asosida baholanishi belgilab qoʻyildi.

Seminar davomida ishtirokchilarga mazkur indikatorlarga oid ma’lumotlarni e’lon qilib borish, ochiqlikka oid qonunchilik hujjatlari talablarga rioya etish, Ochiqlik indeksida yuqori koʻrsatkichlarni qayd etish uchun e’tibor qaratish lozim boʻlgan jihatlar toʻgʻrisida tushuntirishlar berilmoqda.

Tadbir dasturidan davlat organlari va tashkilotlari tomonidan  ochiqlikka oid qonunchilik hujjatlariga rioya etilish holati tahliliga bagʻishlangan ma’ruzalar ham oʻrin olgan. Ayni mavzudagi muloqot mobaynida oʻrganish va masofaviy monitoring natijalari boʻyicha aniqlangan xato va kamchiliklar atroflicha muhokama qilinib, ularni bartaraf etish va oldini olish borasida taklif va mulohazalar bildirildi.

Seminarda, shuningdek, davlat organlari va tashkilotlarida ochiqlikni ta’minlashga mas’ul boʻlgan xodimlar faoliyatining samaradorligi, rasmiy veb-saytlarida axborotlarni joylashtirish va elektron davlat xizmatlari koʻrsatish, korrupsiya holatlarini barvaqt aniqlash va ularning oldini olishda ochiqlik tamoyillaridan foydalanish holatlarini baholash masalalari koʻrib chiqiladi.

Ishtirokchilarga ijtimoiy ahamiyatga molik ma’lumotlarni qonunchilikda belgilangan axborot resurslarida e’lon qilish va jamoatchilik oldida hisobdorlik tizimining yoʻlga qoʻyilishi masalalari xususida ham batafsil ma’lumot beriladi.

Korrupsiyaga qarshi kurashish agentligi

Axborot xizmati