Joriy yilning 29-dekabr kuni Jamoat xavfsizligi universitetida mamlakatimizda korrupsiyaga qarshi kurashish va uning oldini olish boʻyicha amalga oshirilayotgan islohotlar va ularning ahamiyatiga bagʻishlangan tadbir boʻlib oʻtdi. Unda Korrupsiyaga qarshi kurashish agentligi direktori A.Burxanov ishtirok etdi.  

Agentlik direktori 20-dekabrdagi Prezidentimizning Oliy Majlisga va xalqimizga murojaatnomasining asosiy mohiyati, xususan, korrupsiyaga qarshi kurashish yo’nalishidagi tashabbuslarning ahamiyati to’g’risida ma’lumot berib o’tdi. Shuningdek, parlament ishtirokini oshirish, ma’muriy islohotlarni amalga oshirish, korrupsiyaning oqibati bilan emas sabablari bilan kurashish, ochiqlikni ta’minlash, sun’iy monopoliyaga, yopiq sxemalarga, umuman korrupsiyaga imkon yaratadigan barcha bo‘shliqlarga barham berish kelgusi faoliyatning asosiy yo‘nalishiga aylanishi belgilangani qayd etildi.

Tadbirda davlatimiz rahbari tashabbusi bilan korrupsiyaga qarshi kurashishga safarbar etilayotgan zarur kuch va vositalar, jumladan, korrupsiyaga qarshi kurashish yoʻnalishida normativ-huquqiy asoslarni takomillashtirish, bu borada xalqaro standartlarni Oʻzbekiston qonunchiligiga implementatsiya qilish, xalqaro reytinglarda oʻrnimizni yaxshilash borasida olib borilayotgan keng koʻlamli ishlar va ularning samarasi xususida ham to’xtalib o’tildi.

 Muloqotda, shuningdek, huquqni muhofaza qiluvchi organlar xodimlarining korrupsiyaga qarshi kurashish sohasidagi oʻrni va roliga toʻxtalib oʻtildi. Ayniqsa, Universitetning professor-oʻqituvchilari tomonidan kursantlarning “Halollik vaksinasi” doirasida aholi oʻrtasida jamiyatda huquqiy ongni, huquqiy madaniyatni yuksaltirish va qonuniylikni mustahkamlashga qaratilgan bilim hamda koʻnikmalarini oshirishga alohida eʼtibor qaratish zarurligi qayd etildi.

Korrupsiyaga qarshi kurashish agentligi

Axborot xizmati