So‘nggi kunlarda ijtimoiy tarmoqlarda mahalliy davlat hokimiyati organlari mansabdor shaxslarining manfaatlar to‘qnashuvi holatlariga yo‘l qo‘yganligi to‘g‘risidagi xabarlar eʼlon qilinmoqda.

Jumladan, mahalliy hokimliklar mansabdor shaxslari tomonidan ayrim tadbirkorlik subyektlariga tegishli bo‘lgan avtotransport vositalaridan o‘z xizmat vazifasini bajarishda foydalanib kelinayotganligi keng jamoatchilikning keskin eʼtiroziga sabab bo‘lmoqda.

Korrupsiyaga qarshi kurashish agentligi ushbu holatlar yuzasidan quydagilarni maʼlum qiladi.

O‘zbekiston Respublikasining “Davlat fuqarolik xizmati to‘g‘risida”gi Qonunining 12-moddasiga muvofiq, davlat fuqarolik xizmatchisining majburiyatlari belgilab berilgan bo‘lib:

- manfaatlar to‘qnashuviga yo‘l qo‘ymasligi, beg‘araz va xolis bo‘lishi;

- davlat organining nufuzini tushirishga olib kelishi yoki uning o‘z xizmat majburiyatlarini vijdonan bajarishiga shubha tug‘dirishi mumkin bo‘lgan harakatlardan (harakatsizlikdan), shu jumladan o‘z xizmat majburiyatlarini bajarayotganda har qanday shakldagi kamsitishdan, noxolislikdan yoki kimgadir nisbatan alohida munosabatda bo‘lishdan tiyilishi;

- o‘z xizmat mavqeidan shaxsiy va boshqa g‘ayriqonuniy maqsadlarda foydalanmasligi, shuningdek o‘z xizmat faoliyatiga, davlat organlari, ularning mansabdor shaxslari va fuqarolarning faoliyatiga qonunga xilof taʼsir ko‘rsatilishiga yo‘l qo‘ymaslik davlat fuqarolik xizmatchisining majburiyati hisoblanadi.

Shuningdek, mazkur Qonunning 19-moddasiga asosan, manfaatlar to‘qnashuvi davlat fuqarolik xizmatchisining shaxsiy (bevosita yoki bilvosita) manfaatdorligi uning o‘z xizmat vakolatlarini lozim darajada bajarishiga taʼsir ko‘rsatadigan yoxud taʼsir ko‘rsatishi mumkin bo‘lgan hamda fuqarolarning, jamiyatning yoki davlat organining shaxsiy manfaatdorligi va huquqlari, qonuniy manfaatlari o‘rtasida qarama-qarshilik yuzaga keladigan yoki yuzaga kelishi mumkin bo‘lgan vaziyat hisoblanadi.

Mahalliy hokimliklar mansabdor shaxslari tomonidan tadbirkorlik subyektlariga tegishli avtotransport vositalaridan foydalanishi yuqorida qayd etilgan normalarga zid bo‘lib, manfaatlar to‘qnashuvi holatlarini keltirib chiqarmoqda.

Bu esa, o‘z navbatida, korrupsiyaviy xavf-xatarlarni yuzaga kelishiga, keng jamoatchilikning mahalliy davlat hokimiyati organlari rahbarlari, umuman hokimiyat organlarining faoliyatiga salbiy munosabatni shakllanishiga sabab bo‘lmoqda.

Shu munosabat bilan, Agentlik tomonidan Qoraqalpog‘iston Respublikasi Vazirlar kengashi, viloyatlar hokimliklari, shu jumladan, tuman va shahar hokimliklari tasarrufidagi xizmat avtomototransport vositalari to‘g‘risidagi maʼlumotlarni belgilangan tartib va muddatlarda eʼlon qilib borish, barcha tuman (shahar) hokimliklarida o‘rganish o‘tkazish, xususan, hokimliklar balansidagi avtotransport vositalarini inventarizatsiyadan o‘tkazish yuzasidan so‘rov yuborildi.

Bundan tashqari, manfaatlar to‘qnashuviga yo‘l qo‘ygan, shu jumladan, tadbirkorlik subyektlariga tegishli avtotransport vositalaridan o‘z xizmat vazifasini bajarishda foydalanib kelayotgan barcha tuman (shahar) hokimliklari mansabdor shaxslariga nisbatan tegishli choralarni ko‘rish nazoratga olindi.
 

Korrupsiyaga qarshi kurashish agentligi

Axborot xizmati