Ko'rish
Shrift o'lchami
Joriy yilning 29-mart kuni Korrupsiyaga qarshi kurashish agentligida Ochiqlikni taʼminlash sohasida amalga oshirilayotgan ishlarning samaradorligi va natijadorligini baholash komissiyasining yig‘ilishi bo‘lib o‘tdi.
Unda 2022-yil yakunlariga ko‘ra, davlat organlari va tashkilotlarida ochiqlik bo‘yicha amalga oshirilgan ishlarning samaradorligi va natijadorligini baholashga qaratilgan Ochiqlik indeksi asosida to‘plangan barcha ko‘rsatkichlar atroflicha muhokama qilinib, yakuniy natijalar eʼlon qilindi.
Ochiqlik indeksi 84 ta baholash mezonidan tarkib topgan 8 ta indikator asosida baholandi. Samaradorlik ko‘rsatkichlari 71 balldan 100 ballgacha to‘plaganlar - “yashil”, 55 balldan 71 ballgacha bo‘lganlar - “sariq” va 55 balldan past ko‘rsatkich qayd etganlar - “qizil” toifalarga kiritildi.
Baholashda umumiy 86 ta vazirlik, idora va muassasalar qamrab olingan bo‘lib, ulardan 21 tasi vazirlik, 14 tasi mahalliy davlat hokimiyati organlari, 32 tasi davlat ishtirokidagi tashkilotlar hamda 19 tasi qo‘mita va agentliklar.
2022-yil yakunlari bo‘yicha Ochiqlik indeksining yakuniy natijalari keng jamoatchilik uchun index.anticorruption.uz plaftformasiga ochiq joylashtirildi.
Maʼlumot uchun: Baholash komissiyasi Ochiqlik indeksini baholash natijalarini ko‘rib chiqish hamda Ochiqlik indeksi bo‘yicha yakuniy qaror qabul qiluvchi kollegial organ hisoblanib, Korrupsiyaga qarshi kurashish agentligi, O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligi, Axborotlashtirish va telekommunikatsiyalar sohasida nazorat inspeksiyasi, Iqtisodiyot va moliya vazirligi, O‘zbekiston Respublikasi Prezidenti huzuridagi Statistika agentligi mutaxassislari, shuningdek Oliy Majlis Qonunchilik palatasi va Senati hamda NNTlar vakillaridan tashkil topgan.
Tadbirda Korrupsiyaga qarshi kurashish agentligi direktori Akmal Burxanov so‘nggi yillarda ochiqlikni taʼminlash borasida erishilgan yutuqlar, “Ochiqlik indeksi”ni baholash jarayonlarining tashkil etilishiga oid chora-tadbirlar, baholash jarayonlarining raqamlashtirilishi, shu jumladan 2023 yilda ochiqlikni taʼminlashga masʼul xodimlarni o‘qitish xususida to‘xtalib o‘tdi.
Maʼlumot uchun: Agentlik tomonidan o‘tgan 2022 yilda xorijiy ekspertlar ishtirokida 10 ta o‘quv seminarlar tashkil etilib, ularda 200 nafar xodimning malakasi oshirilgan.
Majlis kun tartibiga kiritilgan masalalar doirasida davlat organlari va tashkilotlarida ochiqlikni taʼminlash bo‘yicha amalga oshirilgan ishlarning samaradorligi va natijadorligini baholashga qaratilgan elektron “Open.index” platformasi taqdimoti o‘tkazildi.
Platforma Yevropada xavfsizlik va hamkorlik tashkilotining O'zbekistondagi loyihalar koordinatori idorasi ko‘magida ishlab chiqilgan bo‘lib, har yilgi “Ochiqlik indeksi”ning yakuniy baholash natijalari mazkur manba orqali onlayn eʼlon qilib boriladi.
Eʼtiborlisi, baholash tizimi to‘liq raqamlashtirilgan holda keng jamoatchilikka sohadagi amalga oshirilgan ishlarning samaradorlik va natijadorlik ko‘rsatkichlarini mazkur platforma orqali real vaqt rejimida kuzatish imkoniyati yaratildi.
Shundan so‘ng, Komissiya majlisi kun tartibiga kiritilgan keyingi masala ochiqlikni taʼminlash faoliyatini baholashda bevosita ishtirok etgan davlat organlarining har bir baholash indikatori bo‘yicha hisoboti eshitilib, 2022-yil uchun “Ochiqlik indeksi” bo‘yicha komissiyaning yakuniy qarori qabul qilindi.
“Ochiqlik indeksi”ni baholashda umumiy 86 ta vazirlik, idora va muassasalar qamrab olingan bo‘lib, uning natijasiga ko‘ra, 15 ta davlat organining ochiqlikni taʼminlash faoliyati “yashil” (71-100 ball), 44 tasi “sariq” (55-71 ball) va 27 tasi “qizil” (55 balldan past) samaradorlik ko‘rsatkichlari bilan baholangan.
Eng yuqori samaradorlik ko‘rsatkichlari Statistika agentligi (89 ball), Bojxona qo‘mitasi (88 ball), Toshkent viloyat hokimli (83 ball), Xorazm viloyat hokimligi (79 ball) va “Navoiy kon-metallurgiya kombinati” aksiyadorlik jamiyati (79 ball) tomonidan qayd etilgan.
Majlis yakuni bo‘yicha kun tartibiga kiritilgan masalalardan tashqari, baholashda aniqlangan kamchiliklarni bartaraf etish va oldini olish borasida kompleks chora-tadbirlar dasturini ishlab chiqish haqida qaror qabul qilindi.
Tadbir yakunida esa ochiqlikni taʼminlashda eng yuqori samaradorlik ko‘rsatgan davlat organlarining ochiqlikni taʼminlashga masʼul xodimlari hamda sohani yoritishda alohida faollik ko‘rsatgan jurnalistlardan bir guruhi tashakkurnoma va esdalik sovg‘alar bilan taqdirlandi.
Maʼlumot uchun: O‘zbekiston Respublikasi Prezidentining PF-154-son Farmoniga muvofiq, Baholash komissiyasi qarori asosida “yashil” toifada baholangan davlat organlari va tashkilotlarining masʼul xodimlarini rag‘batlantirish, “qizil” toifada baholanganlariga qonunchilikda belgilangan tartibda intizomiy jazo chorasini qo‘llash yuzasidan taklif kiritish ko‘zda tutilgan.
Korrupsiyaga qarshi kurashish agentligi
Matbuot xizmati
