Korrupsiyaga qarshi kurashish agentligi tomonidan joriy yilning 27-mart kuni “Daryo.uz” saytida eʼlon qilingan “Qashqadaryoda Yangi yil archasini bezash uchun 262,0 mln so‘m sarflandi” nomli xabarda qayd etilgan holatlar bo‘yicha o‘rganish o‘tkazildi.

O‘rganish natijasida Koson tuman Obodonlashtirish boshqarmasi buyurtmachiligida “Archa o‘yinchoqlari” xaridi uchun 2023-yil 27-mart kuni o‘tkazilgan davlat xaridida O‘zbekiston Respublikasi “Davlat xaridlari to‘g‘risida”gi qonunning 7-moddasi (asoslanganlik prinsipi), 8-moddasi (moliyaviy mablag‘lardan foydalanishning oqilonaligi, tejamkorligi va samaradorligi prinsipi) 10-moddasi (raqobat va xolislik prinsipi), 14-moddasi (manfaatlar to‘qnashuvi), 26-moddasi (davlat xaridlari jarayoni) talablari buzilganligi aniqlandi.

Xususan, davlat xaridlarini o‘tkazishning maqsadga muvofiqligi va zarurligi, maqbul muddatlarda o‘tkazish imkonini beradigan oqilona va tejamkor usulda amalga oshirilishi kabi prinsiplariga zid ravishda:

➖davlat xaridlarini rejalashtirish;

➖xarid qilish tartib-taomillarini amalga oshirish;

➖shartnomani tuzish va bajarish bosqichlariga amal qilinmagan holda 2022-yil dekabr va 2023-yil yanvar oyida o‘tkazilgan Yangi yil bayrami uchun noqonuniy tarzda tuman Obodonlashtirish boshqarmasi tomonidan joriy yilning 27-mart kuni “Archa o‘yinchoqlari” xarid qilish yuzasidan davlat xaridi o‘tkazilgan.

Mazkur holatlar bo‘yicha 2023-yil 31-mart kuni xarid komissiyasining bayonnomasini bekor qilish to‘g‘risida buyurtmachiga taqdimnoma kiritildi va chora ko‘rish uchun to‘plangan hujjatlar Davlat moliyaviy nazorat inspeksiyasiga yuborildi.

Agentlikning taqdimnomasiga binoan Koson tuman Obodonlashtirish boshqarmasi tomonidan 2023-yil 4-aprel kuni Xarid komissiyasining bayonnomasi bekor qilindi.

Korrupsiyaga qarshi kurashish agentligi

Axborot xizmati