Joriy yilning 1-may kuni Oliy Majlis Senatida Axborot siyosati va davlat organlarida ochiqlikni taʼminlash masalalari qo‘mitasining navbatdagi majlisi bo‘lib o‘tdi.

Unda Korrupsiyaga qarshi kurashish agentligi tomonidan 2022-yil va 2023-yil birinchi choragida davlat organlari va tashkilotlarining ochiq maʼlumotlar sifatida joylashtirish kerak bo‘lgan ijtimoiy ahamiyatga molik maʼlumotlarining Ochiq maʼlumotlar portali (data.gov.uz) va o‘z rasmiy veb-saytlariga belgilangan vaqtda joylashtirishi yuzasidan o‘tkazilgan monitoring natijalari senatorlar, xalq deputatlari mahalliy Kengashlarining doimiy komissiyalari aʼzolari, tegishli davlat organlari va tashkilotlar masʼullari, ekspertlar va OAV vakillari ishtirokida muhokama qilindi.

Kun tartibidagi masala yuzasidan Agentlik direktori A.Burxanov maʼlumot berdi.

Qayd etilganidek, Agentlik tomonidan ilk bor joriy yilda “Ochiqlik indeksi” baholash reytingi eʼlon qilindi. Baholash jami 86 ta davlat organi va tashkiloti (shundan 21 tasi vazirlik, 14 tasi mahalliy davlat hokimiyati organi, 32 tasi davlat ishtirokidagi tashkilot, 19 tasi qo‘mita va agentlik)ni qamrab oldi.

Indeks natijalari davlat organlari va tashkilotlarida ochiqlikni taʼminlash bo‘yicha amalga oshirilgan ishlarning samaradorligi va natijadorligini baholashga qaratilgan  “Open.index” elektron platformasi  orqali keng jamoatchilikka eʼlon qilindi.

Baholash jarayonlarini har tomonlama sifatli tashkil etish maqsadida Agentlik tomonidan o‘tgan davr mobaynida davlat organlariga mazkur yo‘nalishda muntazam metodik va amaliy yordam ko‘rsatilib, ushbu faoliyatini yuqori samaradorlik asosida tashkil etishga ko‘maklashib borildi.

Jumladan, ochiqlikni taʼminlashga masʼul xodimlarni tizimli o‘qitish yo‘lga qo‘yilib, 2022-yilda xorijiy ekspertlar ishtirokida o‘tkazilgan 10 ta o‘quv kurslarida 200 nafar xodimning malakasi oshirildi.

O‘zaro muhokamalar jarayonida davlat organlari va tashkilotlarining 2023-yilgi ochiqlik faoliyatini o‘rganishda hukumat tarkibiga kirmaydigan davlat organlari va tashkilotlarini, shuningdek, vazirlik va idoralarning hududiy bo‘linmalarini qamrab olish choralarini ko‘rish masalasiga alohida urg‘u berildi.

Majlisda bugungi kunda aksariyat davlat organlari va tashkilotlari tomonidan tegishli axborot resusrlarida davlat xaridlari to‘g‘risidagi maʼlumotlar to‘liq eʼlon qilinmayotganligi ham tanqidiy ko‘rib chiqildi.

Shuningdek, O‘zbekiston Respublikasi Prezidentining 2021 yil 16 iyundagi PF-6247-son Farmoniga muvofiq, Qoraqalpog‘iston Respublikasi Jo‘qorg‘i Kengesi, xalq deputatlari viloyat, tuman, shahar Kengashlari tomonidan o‘z sessiyalarini mahalliy telekanallar, shuningdek, Internet tarmog‘i orqali efirga uzatilish holatiga alohida eʼtibor qaratildi.  

Monitoring natijalari ko‘rsatishicha, 2022 yil davomida xalq deputatlari Qoraqalpog‘iston Respublikasi Jo‘qorg‘i Kengesi, viloyatlar va Toshkent shahar kengashlari tomonidan o‘tkazilgan jami 245 ta sessiyadan faqatgina 61 tasi, yaʼni 25 foizi mahalliy telekanallar yoki Internet tarmog‘i orqali jonli efirga uzatilgan.

Xalq deputatlari shahar va tuman Kengashlari tomonidan esa  Respublika bo‘yicha o‘tkazilgan jami 3 154 ta sessiyadan bor-yo‘g‘i 750 tasi, yaʼni 24 foizi onlayn yoritilgan.

Yuqoridagi holatlar mahalliy Kengashlarning axborot siyosati va mahalliy davlat organlarida ochiqlikni taʼminlash masalalari bo‘yicha doimiy komissiya raislari tomonidan doimiy nazoratga olinishiga kelishib olindi.

Muloqotlar mobaynida yangi tahrirdagi Konstitutsiyada ochiqlikni taʼminlash bo‘yicha kiritilayotgan yangi normalar va ularning muhim ahamiyati  xususida ham maʼlumot berildi.

Taʼkidlanganidek, endilikda ijro etuvchi hokimiyat organlarining ishida ochiqlik va shaffoflikni, qonuniylik va samaradorlikni taʼminlash, ularning faoliyatida korrupsiya holatlariga qarshi kurashish, davlat xizmatlarining sifatini oshirish va ulardan foydalanish imkoniyatini kengaytirish bo‘yicha choralar ko‘rilishi Bosh qomus darajasida belgilab qo‘yildi.

Muhokama etilgan masalalardan kelib chiqib, davlat organlari va  tashkilotlarida ochiqlikni taʼminlash borasida yo‘l qo‘yilayotgan xato va kamchiliklar, ularni bartaraf etish, ochiqlikni taʼminlashni yana-da kuchaytirish borasida Agentlik tomonidan kelgusida amalga oshirilishi lozim bo‘lgan vazifalar belgilab olindi.

Xususan, davlat organlari va tashkilotlari uchun o‘z rasmiy veb-saytida joylashtirilishi majburiy bo‘lgan ijtimoiy ahamiyatga molik maʼlumotlarning namunaviy shakllarini tasdiqlash, shuningdek, davlat hokimiyati va boshqaruvi organlari faoliyatining ochiqligi to‘g‘risidagi qonunchilikni buzgan shaxslarni javobgarlikka tortish vakolatidan keng foydalanib borish  lozimligi qayd etildi.

Bundan tashqari, davlat organlari va tashkilotlarining ochiqlik faoliyatini o‘rganishda maʼlumotlarni rasmiy veb-saytga joylashtirilganlik holati bilan birga ularning sifatiga ham alohida eʼtibor qaratish, monitoring va baholash jarayonlarini inson omilini keskin kamaytirishga qaratilgan raqamli nazorat shaklida olib borish orqali takomillashtirish yuzasidan ham qator taklif va tavsiyalar bildirildi.  

Korrupsiyaga qarshi kurashish agentligi

Axborot xizmati