Ijtimoiy tarmoqlarda Korrupsiyaga qarshi kurashish agentligiga ayni vaqtga qadar davlat byudjetidan ajratilgan mablag‘lar va ularning sarflanganlik holatiga oid asossiz va noto‘g‘ri maʼlumotlar tarqalmoqda.

Mazkur masala bo‘yicha quyidagilar maʼlum qilinadi:

Agentlik davlat organlari va tashkilotlari faoliyatida ochiqlik va shaffoflikni, jamoatchilik oldidagi hisobdorlikni taʼminlash bo‘yicha o‘z vakolati doirasida barcha zaruriy choralarni amalga oshirmoqda va mazkur tamoyillarga birinchi navbatda, o‘z faoliyatida qatʼiy amal qilib kelmoqda. Xususan, Agentlikka davlat byudjetidan ajratilayotgan mablag‘lar va ularning sarflanishi, shuningdek, ochiq eʼlon qilinishi lozim bo‘lgan boshqa maʼlumotlar rasmiy veb-sayt (anticorruption.uz)da keng jamoatchilik uchun ochiq eʼlon qilib kelinmoqda.

Jumladan, Agentlikka respublika byudjetidan o‘tgan davr (2020, 2021, 2022 va 2023 yilning I choragi) mobaynida jami 51,6 mlrd so‘m miqdoridagi mablag‘ ajratilgan.

Ushbu mablag‘larning jami 32,9 mlrd so‘mi Agentlik xodimlarining oylik maoshiga, 23,8 mln so‘mi korrupsiyaga qarshi tadbirlar o‘tkazish uchun, 605,9 mln so‘mi esa Agentlik binosining kommunal va kommunikatsiya xarajatlari uchun sarf qilingan. Bundan tashqari, avtomashinalar sotib olish (Agentlik tashkil etilganda), ehtiyot qismlar va yonilg‘i moylash xarajatlari uchun 1 788,0 mln so‘m, mahalliy va xorijiy xizmat safarlari xarajatlari uchun 616,2 mln so‘m miqdoridagi mablag‘lar ajratilgan.

Shu bilan birga, Agentlik matbuot kotibi 22 million so‘m miqdoridagi oylik ish haqiga ega ekanligi haqida tarqalgan maʼlumot ham haqiqatga to‘g‘ri kelmaydi.

Hozirgi vaqtda matbuot kotibining oylik ish haqi 13,5 mln so‘m miqdorni tashkil etadi.

Shuni ham taʼkidlash joizki, Agentlik O‘zbekiston Respublikasi Prezidentining 2020-yil 29-iyundagi 6013-son Farmoni bilan tashkil etilgan bo‘lib, unga asosan Agentlikning asosiy vazifalari va faoliyat yo‘nalishlari belgilab berilgan. Xususan, Agentlikka mamlakatda korrupsiya holatini tizimli tahlil qilishni taʼminlash, shuningdek, korrupsiyaga oid xavf-xatarlar yuqori bo‘lgan sohalar hamda korrupsiyaga oid huquqbuzarliklar sodir etilishining sabab va shart-sharoitlarini aniqlash va bartaraf etish, korrupsiyaning oldini olish va unga qarshi kurashish sohasidagi davlat siyosatini, korrupsiyaga qarshi kurashish choralarining samaradorligini oshirishga qaratilgan davlat va boshqa dasturlarni shakllantirish va amalga oshirish kabi vazifalar yuklatilgan.

Shu o‘rinda, korrupsiyaviy jinoyatlarni sodir etgan shaxslarni ushlash borasida jinoyat-protsessual qonunchiligi va boshqa qonunchilikda belgilangan tartibda tergovga qadar tekshiruv va tezkor qidiruv tadbirlarini o‘tkazish Agentlik vakolatlariga kirmaydi.

Biroq, Agentlik tomonidan jismoniy va yuridik shaxslarning murojaatlari hamda masofaviy monitoring tadbirlari asosida korrupsiyaviy holatlar muntazam o‘rganilib, to‘plangan hujjatlar qonuniy qaror qabul qilish uchun huquqni muhofaza qiluvchi organlarga taqdim etib borilmoqda.

Xususan, ayni vaqtga qadar byudjet mablag‘larining sarflanishi va davlat dasturlari bajarilishi yuzasidan Agentlik tomonidan 100 dan ortiq o‘rganishlar o‘tkazilgan bo‘lib, ular natijasida aniqlangan korrupsiya holatlari yuzasidan huquqni muhofaza qiluvchi organlar tomonidan Jinoyat kodeksining tegishli moddalari bilan 91 ta jinoyat ishi va 107 ta maʼmuriy ishlar qo‘zg‘atilgan.

Jumladan, birgina davlat xaridlari sohasida o‘tkazilgan o‘rganishlar jarayonida jami 1 trln 230 mlrd so‘mlik xaridlar jarayonida yo‘l qo‘yilgan qonunbuzilishi holatlari yuzasidan huquqni muhofaza qiluvchi organlarga 301 ta so‘rovnoma yuborilgan bo‘lib, shundan qariyb 710 mlrd so‘mlik xaridlar bo‘yicha buyurtmachilarga ular tomonidan davlat xaridlari bo‘yicha berilgan eʼlonlarni bekor qilish yuzasidan jami 615 ta taqdimnoma kiritilib, byudjet mablag‘larining maqsadsiz sarflanishining (affillanganlik, raqobatni cheklash, manfaatlar to‘qnashuvi kabi qonunbuzilishlar) oldi olingan.

Yuqoridagilarga ko‘ra, axborot vositalari va ijtimoiy tarmoq kanallaridan jamoatchilikka to‘g‘ri va xolis axborot yetkazishni so‘raymiz.

Korrupsiyaga qarshi kurashish agentligi

Axborot xizmati