O‘zbekiston Respublikasi Prezidentining 2021-yil 16-iyundagi PF-6247-son Farmoniga muvofiq, joriy yilda ham oliy taʼlim muassasalari (OTM)ning bakalavriat taʼlim yo‘nalishlariga kirish uchun test va ijodiy (kasbiy) imtihonlar o‘tkazish jarayonlarining Internet tarmog‘ida jonli efirga uzatilishi taʼminlandi.

Bu borada Korrupsiyaga qarshi kurashish agentligi hamda Oliy taʼlim, fan va innovatsiyalar vazirligi tomonidan 2023-yil 17-iyul kuni OTMga 2023/2024 o‘quv yili uchun o‘qishga qabul jarayonlarini tashkil etishda korrupsiya holatlarining oldini olish, imtihonlarni ochiq va shaffof o‘tkazilishini taʼminlashga doir qo‘shimcha chora-tadbirlar to‘g‘risida imzolangan qo‘shma qaror  doirasida tegishli ishlar amalga oshirildi.

Jumladan,  ijodiy imtihonlarning shaffof va ochiqlik prinsiplari asosida o‘tkazilishini taʼminlash, korrupsiyaviy huquqbuzarliklar sodir etilishining oldini olish, eʼtirozlarning yuzaga kelishiga sharoit yaratmaslik maqsadida OTMlarga vazirlik xodimlari, oliy taʼlim muassasalaridagi korrupsiyaga qarshi kurashish (“komplayens-nazorat”) bo‘limlari va boshqa mutassadi xodimlar biriktirildi.

Agentlik tomonidan https://imtihon.edu.uz veb-sayti asosida 2023-yil 24-iyuldan 7-avgustga qadar OTMlarning bakalavriat taʼlim yo‘nalishlariga kirish uchun ijodiy (kasbiy) imtihonlar o‘tkazish jarayonini Internet tarmog‘ida jonli efirga uzatilish holati tahlil qilib borildi. Unga ko‘ra, 51 ta OTMda imtihon jarayonlarining onlayn translyatsiyasi taʼminlandi, biroq quyidagi 9 ta OTMda ayrim taʼlim yo‘nalishlari bo‘yicha imtihonlar o‘tkazish jarayonining Internet tarmog‘ida jonli efirga uzatilishi ovozsiz tarzda amalga oshirilganligi aniqlandi va ushbu kamchiliklarni bartaraf etish choralari ko‘rildi:

1.Buxoro davlat pedagogika instituti

2.Navoiy davlat pedagogika instituti

3.Namangan davlat pedagogika instituti

4.Termiz davlat universiteti

5.Farg‘ona davlat universiteti

6.Qo‘qon pedagogika universiteti

7.Urganch davlat pedegogika instituti

8.Toshkent davlat texnika universiteti

9.Samarqand davlat chet tillar instituti

Bundan tashqari, joriy yilning 26-27 iyul kunlari Toshkent davlat sharqshunoslik universiteti "Xalqaro jurnalistika” taʼlim yo‘nalishida bo‘lib o‘tgan ijodiy (kasbiy) imtihonda Agenlik xodimlari kuzatuvchi sifatida bevosita ishtirok etdi.

Kirish imtihonlari jarayonlarida korrupsiyaviy holatlarga duch kelgan fuqarolar bu haqda tezkor murojaat yo‘llash imkoniga ega bo‘lishi uchun vazirlikning 1006 qisqa raqamli va 71 207 1843 raqamli ishonch telefonlari, anticor@edu.uz va anticorruption@edu.uz elektron pochtalari, @EduAntiCorruptionBot telegram boti faoliyat ko‘rsatdi.  Ushbu aloqa kanallari orqali kelib tushgan murojaatlarga o‘z vaqtida munosabat bildirilib, tegishli choralar ko‘rildi.

Joriy yil 18-24 avgustda 89 ta davlat OTMda texnikumlarni muvaffaqiyatli tamomlagan bitiruvchilarni suhbat asosida mutaxassislik yo‘nalishi bo‘yicha 2-kursdan o‘qishga qabul qilish uchun suhbatlar bo‘lib o‘tdi. Ushbu jarayonda korrupsiyaviy harakatlar sodir etilishining oldini olish bo‘yicha OTMda korrupsiyaga qarshi kurashish bo‘limlari xodimlari ishtirokida tavsiya qilinganlar bilan suhbat o‘tkazish komissiyalari tuzildi.

Agentlik tomonidan mazkur suhbatlarning jonli translyatsiya qilinishi monitoring qilib borildi.   

Monitoring mobaynida Farg‘ona jamoat salomatligi tibbiyot institutida 21-avgust kuni holatiga suhbat jarayoni texnik nosozlik tufayli ovozsiz translyatsiya qilinayotganligi aniqlandi va shu vaqtning o‘zidayoq masʼullar bilan birgalikda ushbu holatni  bartaraf etish choralari ko‘rildi.

Korrupsiyaga qarshi kurashish agentligi

Axborot xizmati