Agentlik direktori A.Burxanov boshchiligidagi ishchi guruh tomonidan korrupsiyaga qarshi kurashish borasida amalga oshirilayotgan ishlar bilan tanishish hamda bu boradagi chora-tadbirlarni belgilab olishga ko‘maklashish yuzasidan hududlarda o‘tkazib kelinayotgan o‘rganishlar 28-29-sentabr kunlari Buxoro viloyatida davom ettirildi.

Ishchi guruh tomonidan Prezident farmon va qarorlarida belgilangan investitsiya dasturlari doirasida ajratilgan mablag‘larning maqsadli sarflanishida ochiqlik va shaffoflikni taʼminlash bo‘yicha Agentlikka yuklatilgan vazifalar ijrosini taʼminlash yuzasidan o‘rganishlar o‘tkazildi.

Jumladan, O‘zbekiston Respublikasi Prezidentining 2021-yil 18-sentabrdagi PQ-5246-son qaroriga asosan, Islom taraqqiyot banki va Birlashgan Millatlar Tashkiloti Taraqqiyot Dasturi hamkorligida «Qishloq joylarni barqaror rivojlantirish» loyihasi doirasida ajratilgan mablag‘larning maqsadli ishlatilishi jarayonida ochiqlik va oshkoralikning taʼminlanganligi Buxoro shahri va Vobkent tumani misolida o‘rganildi.

Mazkur Qarorga muvofiq Buxoro viloyatining Kogon, Vobkent, Shofirkon, G‘ijduvon va Buxoro kabi 5 ta tumanidagi tanlab olingan 41 ta MFYlda (10 ta markaziy, 31 ta yondosh mahalla) 283 ta birlamchi va dolzarb subloyihalar amalga oshirilishi belgilangan.

Jumladan:

40 ta umumtaʼlim maktablari (14 ta sport zallari bilan);

33 ta maktabgacha taʼlim tashkilotlari;

21 ta tibbiyot muassasalari;

463 km (8 ta inshoot bilan) ichimlik suv tarmoqlari;

316 km (2 ta ko‘prik bilan) asosiy va ichki yo‘llar;

53 km piyodalar yo‘lagi;

43 km tungi yoritish tizimlari;

51 km sug‘orish tizimlarini yaxshilash;

1 ta tadbirkorlik markazi;

174 ta transformatorlarni o‘rnatish va 340 km elektr tarmoqlarini yangidan qurish, rekonstruksiya qilish hamda mukammal taʼmirlash ishlarini amalga oshirish ko‘zda tutilgan.

Ushbu loyihalar uchun Islom taraqqiyot banki hisobidan Buxoro viloyatiga 73,7 mln AQSH dollari miqdorida mablag‘ ajratish belgilangan.

O‘rganish doirasida Buxoro shahrida loyiha doirasida hududlarda faoliyat yuritayotgan ijtimoiy infratuzilma obyektlari (maktab, maktabgacha taʼlim va sog‘liqni saqlash muassasalari) va loyiha tashkilotlari muhandis bo‘limlari mutaxassislari uchun mo‘ljallangan «Havoni konditsionerlash tizimi» mavzusida o‘tkazilgan malaka oshirish treningida ishtirok etildi.

Bugun ishchi guruh Vobkent tumani Nayman mahalla fuqarolar yig‘inida bo‘lib, mazkur loyiha doirasida mahalla aholisi, faollar orasidan tashkil topgan tashabbuskor guruh bilan birgalikda ishlab chiqilib, mahalliy hokimiyat organlari, muhandislik kommunikatsiyalari va ijtimoiy xizmat ko‘rsatish obyektlari vakillari bilan kelishilgan “Mahallani rivojlantirish rejasi” (MRR) bilan tanishildi.

Mazkur tadbirlarda Agentlik direktori A.Burxanov loyihani amalga oshirish jarayonida shaffoflikni taʼminlash va korrupsiyaning oldini olish bo‘yicha Agentlik vazifalari hamda amalga oshirilayotgan ishlar to‘g‘risida batafsil maʼlumot berdi.

Shuningdek, mahalla aholisi bilan muloqot qilinib, loyihani sifatli amalga oshirilishi ustidan jamoatchilik nazoratini o‘rnatish, mablag‘larning maqsadli sarflanishi va bu jarayonda ochiqlikning taʼminlanishi bo‘yicha doimiy nazorat olib borishga kelishib olindi.

Korrupsiyaga qarshi kurashish agentligi
Axborot xizmati