Surxondaryo viloyatida Ishchi guruh tomonidan olib borilayotgan o‘rganishlarning asosiy yo‘nalishlaridan biri  Prezident farmon va qarorlarida belgilangan xalqaro moliya institutlari tomonidan ajratilgan kredit mablag‘larining maqsadli sarflanishida ochiqlik va shaffoflikni taʼminlash bo‘yicha Agentlikka yuklatilgan vazifalar ijrosini taʼminlashdir. 

Shu maqsadda viloyatdagi  "Darband — Boysun — Elbayon" hamda  "Manguzar — Jarqo‘rg‘on — Bandixon — Oltinsoy — Denov" avtomobil yo‘lini rekonstruksiya qilish loyihasi bo‘yicha amalga oshirilayotgan ishlar bilan tanishildi. 

Loyiha O‘zbekiston Respublikasi Prezidentining 2022-yil 4-apreldagi “Osiyo taraqkiyot banki ishtirokida avtomobil yo‘llarini rekonstruksiya qilish loyihalarini amalga oshirish chora-tadbirlar to‘g‘risida”gi PQ-189-son qaroriga muvofiq amalga oshirilmoqda. 

Maqsad - mazkur hududlar orqali tranzit yuk tashishni hamda eksport-import yuklarini tashish hajmining o‘sishini taʼminlash, yo‘l harakati xavfsizligini yaxshilash, yuk va yo‘lovchi tashishning asosiy yo‘nalishlari bo‘yicha sig‘im zahiralarini 4 karra oshirish, baxtsiz hodisalarni kamaytirish, yo‘lbo‘yi infratuzilma obyektlari xavfsizligi darajasini oshirishdan iborat.   

Loyiha doirasida qurilish-montaj ishlari 2023-yilning 12-fevral kunidan boshlangan bo‘lib, bugungi kunga qadar pudratchi tashkilotiga 32,9 mln AQSH dollari miqdoridagi mablag‘lar to‘lab berilgan.

Bugungi kunda pudratchi tashkiloti tomonidan qurilish obyektiga 130 dan ortiq mashina-mexanizmlar va maxsus texnikalar, 260 nafardan ortiq xorijiy va mahalliy mutaxassislar hamda ishchi-xodimlar jalb qilingan. 

O‘rganish davomida olib borilayotgan demontaj, muhandislik (ichimlik suvi, aloqa, elektr va h.k.) tarmoqlarini ko‘chirish hamda yo‘l asosini qurish uchun material zaxirasini to‘plash ishlari ko‘zdan kechirildi. 

Shuningdek, loyiha doirasida amalga oshirilayotgan ishlar va qabul qilingan hujjatlar ochiqligi taʼminlanganlik holati o‘rganildi.

Agentlik tomonidan loyihani amalga oshirishga masʼul ijrochi organ —  Avtomobil yo‘llari qo‘mitasiga mablag‘larning ajratilishi jarayonida ochiqlik va oshkoralikni taʼminlash, shu jumladan, loyiha taqdimoti, o‘tkazilgan tender va tanlovlar, amalga oshirilishi rejalashtirilgan ish hajmi va erishiladigan natijalar, amalga oshirilgan ishlar (qurilish-montaj) bo‘yicha maʼlumotlarni rasmiy veb-sayt, ijtimoiy tarmoqlar va OAVda eʼlon qilib borish yuzasidan  tavsiyalar berib kelinmoqda.

Tegishli normativ-huquqiy hujjatlar talabi hamda Agentlik ko‘rsatmasiga asosan Qo‘mita rasmiy veb-saytida alohida sahifa tashkil etilgan bo‘lib, yuqoridagi masalalar yuzasidan muntazam ravishda tegishli maʼlumotlar o‘z vaqtida joylashtirib kelinmoqda.

Agentlik tomonidan loyiha  doirasida ajratilgan mablag‘larning maqsadli ishlatilishi jarayonida ochiqlik va oshkoralikni taʼminlash ustidan shu kabi nazorat ishlari izchil davom ettiriladi.

Korrupsiyaga qarshi kurashish agentligi

Axborot xizmati