Joriy yilning 13-oktabr kuni Senatda xalq deputatlari mahalliy Kengashlarning Axborot siyosati va mahalliy davlat organlarida ochiqlikni taʼminlash masalalari bo‘yicha doimiy komissiyalari raislari uchun seminar tashkil etildi.

Unda Senat aʼzolari, mahalliy Kengash deputatlari, OAVlari vakillari va ekspertlar ishtirok etdi.

Tadbirda davlat organlari va tashkilotlarning hududiy tuzilmalari tomonidan ochiqlikni taʼminlash borasidagi ishlarini kuchaytirish, mahalliy Kengashlarning tomonidan har bir sessiyalarni jonli efirga uzatish ishlarini yanada jonlantirish kabi masalalar muhokama qilindi.

Seminarda Korrupsiyaga qarshi kurashish agentligi masʼul xodimi B.Safarov Agentlik tomonidan o‘tgan yil yakunlariga ko‘ra davlat organlari va tashkilotlarida ochiqlikni taʼminlash bo‘yicha amalga oshirilgan ishlarni baholash bo‘yicha eʼlon qilingan Ochiqlik indeksi hamda uning natijalari bo‘yicha amalga oshirilayotgan ishlar xususida maʼlumot berib o‘tdi.

Muloqot mobaynida, shuningdek, O‘zbekiston Respublikasi Prezidentining 2021-yil 16-iyundagi “Davlat organlari va tashkilotlarining faoliyati ochiqligini taʼminlash, shuningdek, jamoatchilik nazoratini samarali amalga oshirishga doir qo‘shimcha chora-tadbirlar to‘g‘risida”gi PF-6247-son farmoniga muvofiq, davlat organlari va tashkilotlari tomonidan ochiq maʼlumotlar sifatida joylashtirilishi kerak bo‘lgan ijtimoiy ahamiyatga molik maʼlumotlarni belgilangan resurslarda eʼlon qilinish holati bo‘yicha Agentlik tomonidan muntazam ravishda olib borilayotgan o‘rganishlar va ularning tahliliga ham alohida eʼtibor qaratildi.

Yuqoridagi masalalar bo‘yicha doimiy komissiya raislariga davlat organlari va tashkilotlarining hududiy tuzilmalarida ochiqlikni taʼminlash borasidagi ishlarni samarali nazorat qilish, sohada yo‘l qo‘yilayotgan kamchiliklarni bartaraf etish yuzasidan tegishli tavsiyalar berildi.

Seminar yakunida mahalliy davlat hokimiyati organlari, vazirlik va idoralar faoliyatining ochiqlik darajasini oshirish ishlariga eʼtiborni kuchaytirish, doimiy komissiya raislari, kotibiyat mudirlari, axborot xizmatlari rahbarlarini soha mutaxassislari bilan hamkorligini kengaytirishga kelishib olindi.

Korrupsiyaga qarshi kurashish agentligi

Axborot xizmati