Маълумки, жорий йилнинг январь ойида Коррупцияга қарши курашиш агентлиги ҳузурида Жамоатчилик кенгаши ташкил этилган. Ўтган вақт давомида Кенгаш ўз низоми ва иш режасига асосланган ҳолда коррупцияга оид норматив-ҳуқуқий ҳужжатлар, дастурларга ўз таклифларни бериш ҳамда Агентлик фаолияти устидан жамоатчилик назоратини ўрнатиш бўйича бир қатор ишларни амалга ошириб келмоқда.

Коррупцияга қарши курашиш агентлигининг 2021 йилга мўлжалланган вазифалари қаторида Жамоатчилик кенгаши фаолияти самарадорлигини оширишга қаратилган туркум тадбирлар ташкил этиш белгиланган эди.

Ушбу вазифалар ижросини таъминлаш мақсадида жорий йилнинг 21-22 апрель кунлари “Юксалиш” умуммиллий ҳаракати кўмагида Агентлик ҳузуридаги Жамоатчилик кенгаши вакиллари учун махсус тренинглар ташкил этилмоқда.

Семинарнинг бугун бўлиб ўтган илк кунида ўз фаолиятини йўлга қўйиш учун керак бўлган билим ва кўникмаларини шакллантириш ҳамда салоҳиятини ошириш, жамоатчилик кенгашларининг мақсад ва вазифалари, иш юритиш услублари, уларнинг фаолиятини режалаштириш масалаларига урғу берилди.

Тренинг ўз ишини эртага давом эттиради ва жамоатчилик мониторинги ва жамоатчилик эшитувлари каби механизмларни самарали ишлатиш ҳамда жамоатчилик ва ОАВ билан очиқ мулоқотни йўлга қўйиш масалалари кун тартибидан ўрин олган.