Коррупцияга қарши курашиш агентлиги томонидан Сурхондарё вилояти Термиз шаҳар Болалар юқумли касалликлар шифохонаси ходимларининг мурожаатлари ўрганилди. 

Мурожаатларда Тиббиёт бирлашмаси бошлиғи томонидан шаҳар Болалар юқумли касалликлар шифохонасининг юридик мақоми қонунга зид равишда бекор қилингани, ходимларнинг иш ставкалари асоссиз қисқартирилиб, иш ҳақи ҳисобидан обуна учун мажбурий ушланиб қолинганлиги ҳамда давлат мулкини ноқонуний тасарруф этиш билан боғлиқ қатор қонунбузилиши ҳолатларига йўл қўйилгани маълум қилинган.

Ўрганишлар давомида, Термиз шаҳар тиббиёт бирлашмаси бошлиғи томонидан ҳуқуқий асоссиз, ўзбошимчалик билан шаҳар Болалар юқумли касалликлар шифохонасининг мустақил юридик шахс мақоми бекор қилиниб, амалда шаҳар тиббиёт бирлашмасининг норасмий бўлимига айлантирилган.
Шифохона амалда шаҳар тиббиёт бирлашмасининг бўлимига айлантирилган бўлсада, жиҳоз ва моддий-техник воситалари қонунда белгиланган тартибда шаҳар тиббиёт бирлашмаси ихтиёрига ўтказилмай, шифохона бош врачи лавозими қисқартирилмаган ҳолда ортиқча иш ҳақи тўлаб келинган.

Шифохонада амалга оширилган қурилиш-таъмирлаш ишларида амалда бажарилмаган ишлар ҳисобот ҳужжатларига қўшиб ёзилган.

Бунда пудрат шартномаси тузилмаган ҳолда 2019 йилда «Аму Сурхондарё Агросервис» МЧЖ томонидан таъмирланиб, аслида бажарилмаган қурилиш ишлари учун катта миқдордаги тўлов сўммалари қўшиб ёзилган.

Ўзбекистон Республикаси Молия вазирининг 2004 йил 16 августдаги 101-сон буйруғи билан тасдиқланган «Асосий воситаларни балансдан чиқариш тартиби тўғрисида»ги (Адлия вазирлиги томонидан 2004 йил 29 августда 1401-сон билан давлат рўйхатидан ўтказилган) Низом талабларига риоя этилмаган ҳолда, шифохона ҳудудини ўраб турган бетон ғишт девор белгиланган тартибда нуқсон далолатномаси расмийлаштирилмасдан бузилиб, ундан чиққан 19,6 млн. сўмлик қурилиш материаллари ўзга шахсларга ноқонуний бериб юборилган.

Шунингдек, ўрганиш жараёнида шаҳар тиббиёт бирлашмаси бошлиғи ўз фаолиятида манфаатлар тўқнашувига сабаб бўладиган ҳолатларга ҳам йўл қўйганлиги маълум бўлди.

Жумладан, меҳнат қонунчилигига зид равишда ўғлини бирлашманинг 3-сонли оилавий поликлиникасига 1.0 ставка умумий амалиёт шифокори лавозимига қабул қилиб, қўшимча 0.75 иш ставкасини  амалий заруриятсиз қўшиб берган.

2020 йил 22 августдан 2020 йил 20 октябргача бўлган даврда ўғлини коронавирус инфекцияси билан зарарланган ҳомиладор ва гинекологик хасталиги мавжуд аёлларга тиббий ёрдам кўрсатиш, даволаш ҳамда мулоқотда бўлганларни яккалаш учун бирлашманинг туғруқ бўлими негизида ташкил этилган 90 ўринли госпиталда (ковид маркази)  статист врач этиб тайинлаб, узлуксиз ишлашига шароит яратган. 
Бунинг натижасида, ўғли коронавирус инфекцияси тарқалишига қарши курашишга жалб қилинган ходимлар учун тўланадиган қўшимча моддий тўловларни асоссиз олиш имкониятига эга бўлган.

Бирлашма балансидаги автотранспорт воситасини  ўғлига буйруқсиз, бошқариш ва моддий жавобгарликни белгилаш тўғрисидаги шартномани расмийлаштирмасдан норасмий тарзда бириктириб берган. Натижада, ўғли бирлашма ҳисобидаги автотранспортлар учун ажратилган ёқилғилардан ўз шахсий манфаати йўлида мақсадсиз фойдаланган.   

Шифохона ходимларини фаолиятига тааллуқли бўлмаган матбуот нашрларига мажбурий обуна қилдирган. Бунинг учун ходимларнинг ойлик маошидан пул маблағлари ушлаб қолинган.

2019 йилда “Ўзбекистон Республикаси Соғлиқни сақлаш вазирлиги тизимидаги даволаш-профилактика муассасаларида Олий ҳамширалик иши, ўрта тиббий ва доришунос ходимларни ишга қабул қилиш тартиби” талабларига зид равишда тиббиёт бирлашмасига ўрта тиббиёт ходимларини ишга қабул қилган.

Дастлабки ўрганишлар давомида фуқаро  ўз фаолиятида таниш-билишлик, ўзбошимчалик, ваколат доирасидан четга чиқиш, манфаатлар тўқнашувига йўл қўйиш каби қонун талабларини қўпол равишда бузганлиги маълум бўлди.

Ҳозирги вақтда дастлабки ўрганишларда аниқланган ҳолатлар юзасидан прокуратура органлари томонидан ҳуқуқий баҳо бериш чоралари кўрилмоқда.