Ўзбекистон Республикасининг 2021 йил 22 апрелдаги янги таҳрирдаги “Давлат харидлари тўғрисида”ги қонунига асосан, Коррупцияга қарши курашиш агентлиги ўз ваколатлари доирасида давлат харидлари соҳасидаги қонунчилик ҳужжатларининг тўғри қўлланилиши устидан давлат назоратини амалга оширувчи ваколатли органлардан бири этиб белгиланган.

Агентлик томонидан жорий йилнинг июль-авгсут ойларида республиканинг барча ҳудудларида давлат харидларини амалга оширишда қонун ҳужжатлари ва бошқа норматив ҳужжатларга риоя қилиниш ҳолати ўрганилди.

Хусусан, Навоий вилоятида бюджет буюртмачилари томонидан давлат харидлари махсус ахборот порталига қурилиш бўйича жойлаштирилган эълонлар танлов асосида жойига чиқиб ўрганилди.

Ўрганишлар давомида, буюртмачилар томонидан 5 та ҳолатда умумий қиймати 1,8 млрд. сўмлик қурилиш-таъмирлаш ишлари танлов (тендер) савдолари ўтказилмасдан, шунингдек пудрат шартномалари тузилмасдан бажарилганлиги аниқланган.

Жумладан, Навоий вилояти ҳокимлиги “Ягона буюртмачи хизмати” ИК томонидан 2 та ҳолатда 626 797 153 сўмлик,  Навоий ихтисослаштирилган маданият мактаби томонидан 491 778 600 сўмлик, Нурота тумани Халқ таълими бўлими томонидан 601 420 600 сўмлик ҳамда Қизилтепа туман хокимлиги томонидан 125 575 400 сўмлик қурилиш-таъмирлаш ишлари буюртмачилар томонидан “Давлат харидлари тўғрисида”ги қонун ҳужжатлари талабларига зид равишда танлов савдолари ўтказилмасдан, қурилиш корхоналари билан пудрат шартномаси тузилмасдан бажарилганлиги аниқланган.

Агентлик ходимлари буюртмачилар томонидан қурилиш бўйича берилган эълонларга асосан қурилиш-таъмирлаш ишлари режалаштирилган объектларни жойига чиқиб ўрганишганида, қурилиш ишлари бошланиб бўлган ёҳуд бир неча ой аввал якунлангани маълум бўлган.

Хусусан, Нурота тумани Халқ таълими бўлими томонидан тумандаги 12-сонли умумтаълим мактабини жорий таъмирлаш бўйича давлат харидлари порталига жорий йилнинг 28 май кунида бошланғич баҳоси 601 420 600 сўм бўлган эълон жойлаштирилган, бироқ эълон бўйича иштирокчилардан тижорат таклифлари келиб тушмаганлиги сабаб танлов савдолари ўтказилмаган. 

Юқорида келтирилган ҳолатлар бўйича мансабдор шахсларнинг хатти-ҳаракатларига ҳуқуқий баҳо бериш мақсадида ҳужжатлар Бош прокуратурага юборилди. 

Агентлик ходимлари томонидан ҳудудларда ўрганиш ишлари давом этмоқда.