O‘zbekiston Respublikasining 2021 yil 22 apreldagi yangi tahrirdagi “Davlat xaridlari to‘g‘risida”gi qonuniga asosan, Korrupsiyaga qarshi kurashish agentligi o‘z vakolatlari doirasida davlat xaridlari sohasidagi qonunchilik hujjatlarining to‘g‘ri qo‘llanilishi ustidan davlat nazoratini amalga oshiruvchi vakolatli organlardan biri etib belgilangan.

Agentlik tomonidan joriy yilning iyul-avgsut oylarida respublikaning barcha hududlarida davlat xaridlarini amalga oshirishda qonun hujjatlari va boshqa normativ hujjatlarga rioya qilinish holati o‘rganildi.

Xususan, Navoiy viloyatida budjet buyurtmachilari tomonidan davlat xaridlari maxsus axborot portaliga qurilish bo‘yicha joylashtirilgan e’lonlar tanlov asosida joyiga chiqib o‘rganildi.

O‘rganishlar davomida, buyurtmachilar tomonidan 5 ta holatda umumiy qiymati 1,8 mlrd. so‘mlik qurilish-ta’mirlash ishlari tanlov (tender) savdolari o‘tkazilmasdan, shuningdek pudrat shartnomalari tuzilmasdan bajarilganligi aniqlangan.

Jumladan, Navoiy viloyati hokimligi “Yagona buyurtmachi xizmati” IK tomonidan 2 ta holatda 626 797 153 so‘mlik,  Navoiy ixtisoslashtirilgan madaniyat maktabi tomonidan 491 778 600 so‘mlik, Nurota tumani Xalq ta’limi bo‘limi tomonidan 601 420 600 so‘mlik hamda Qiziltepa tuman xokimligi tomonidan 125 575 400 so‘mlik qurilish-ta’mirlash ishlari buyurtmachilar tomonidan “Davlat xaridlari to‘g‘risida”gi qonun hujjatlari talablariga zid ravishda tanlov savdolari o‘tkazilmasdan, qurilish korxonalari bilan pudrat shartnomasi tuzilmasdan bajarilganligi aniqlangan.

Agentlik xodimlari buyurtmachilar tomonidan qurilish bo‘yicha berilgan e’lonlarga asosan qurilish-ta’mirlash ishlari rejalashtirilgan ob’ektlarni joyiga chiqib o‘rganishganida, qurilish ishlari boshlanib bo‘lgan yohud bir necha oy avval yakunlangani ma’lum bo‘lgan.

Xususan, Nurota tumani Xalq ta’limi bo‘limi tomonidan tumandagi 12-sonli umumta’lim maktabini joriy ta’mirlash bo‘yicha davlat xaridlari portaliga joriy yilning 28 may kunida boshlang‘ich bahosi 601 420 600 so‘m bo‘lgan e’lon joylashtirilgan, biroq e’lon bo‘yicha ishtirokchilardan tijorat takliflari kelib tushmaganligi sabab tanlov savdolari o‘tkazilmagan. 

Yuqorida keltirilgan holatlar bo‘yicha mansabdor shaxslarning xatti-harakatlariga huquqiy baho berish maqsadida hujjatlar Bosh prokuraturaga yuborildi. 

Agentlik xodimlari tomonidan hududlarda o‘rganish ishlari davom etmoqda.