Жорий йилнинг 30 август куни Ўзбекистон Республикаси Президенти ҳузуридаги Давлат бошқарув академиясининг мажлислар залида Ўзбекистон Республикаси давлат мустақиллигининг 30 йиллиги байрамига бағишланган тантанали тадбир бўлиб ўтди. Унда Коррупцияга қарши курашиш агентлиги раҳбарияти ҳамда ходимлари иштирок этишди. Тантанали тадбир юрт мадҳияси садолари остида бошланди. Йиғилишни Агентлик директори А.Бурханов очиб бериб, Янги Ўзбекистон тарихидаги буюк ва шонли сана – истиқлолнинг ўттиз йиллик байрамини халқимиз катта шоду хуррамлик билан кутиб олаётганини таъкидлади. Зеро, мамлакатимизда янги демократик давлат, фуқаролик жамиятини барпо этиш йўлида ўтган даврда амалга оширилган улкан ишлар, эришилган юксак натижаларда, ҳеч шубҳасиз, ҳаётимизнинг турли соҳа ва тармоқларида фидокорона меҳнат қилаётган юртдошларимизнинг беқиёс ҳиссаси бор.

Шу қаторда Агентлик ходимлари ҳам ўтган қисқа даврда жойларда қарор ва қонунлар ижросининг таъминланишини ўрганишга киришишди. Хусусан, Агентлик ташкил этилганидан буён 4 мингдан зиёд юридик ва жисмоний шахслар томонидан мурожаатлар келиб тушган бўлиб, ушбу мурожаатларни ижобий ҳал этилишига кўмаклашишди. Коррупция хавфи юқори деб топилган давлат ташкилотлари ҳамда идораларида “Коррупциясиз соҳа” лойиҳалари амалга оширилиб, ўз натижаларини бермоқда.

Тадбир давомида Агентлик директори ўринбосари У.Тухташева ва бошқа ходимлар сўзга чиқиб, барчани айём билан қутладилар. Таъкидланганидек, Ўзбекистон ўтган давр мобайнида жаҳон ҳамжамиятидан муносиб ўрин эгаллаб, миллий тикланишдан миллий юксалиш сари дадил илгарилаб бормоқда. Айниқса, охирги йилларда коррупцияга қарши курашиш соҳасида изчил ислоҳотлар амалга оширилиб, соҳани тартибга солиш, шунингдек, жамиятда коррупция иллатига нисбатан муросасиз муносабат муҳитини яратишга қаратилган 70 дан ортиқ норматив ҳужжатлар қабул қилинди. Фуқаролар ва тадбиркорларнинг давлат хизматларидан фойдаланишларидаги турли бюрократик тўсиқлар, коррупциявий омиллар бартараф этиб келинмоқда.

Ушбу ижобий ўзгаришлар халқаро рейтинг ва индексларда ҳам эътироф этилаётганлиги таъкидланди. Хусусан, 2020 йилнинг декабрь ойида “Open Data Watch” халқаро нотижорат ташкилоти томонидан эълон қилинган очиқ маълумотлар рейтингида Ўзбекистон 63 балл билан жаҳон бўйича 187 мамлакат орасидан 44-ўринни, Марказий Осиёда эса 1-ўринни эгаллгани, Ўзбекистон ушбу кўрсаткич бўйича 2018 йилга нисбатан 125 ўринга юқорилаган дунёдаги икки мамлакатдан бири сифатида эътироф
этилгани, Transparency International халқаро ташкилоти Коррупцияни қабул қилиш индексининг 2020 йил рейтингида Ўзбекистон ўз ўрнини 7 поғонага яхшилаб, 180 та давлат орасида 146-ўринни эгаллагани (2019 йилда 153 ўрин) шулар жумласидандир.

Дарҳақиқат, шу кунларда юртимиз бўйлаб барча гўшаларда энг улуғ, энг азиз айёмимиз – мамлакатимиз мустақиллигининг ўттиз йиллиги “Янги Ўзбекистонда эркин ва фаровон яшайлик!” шиори остида кенг нишонланмоқда. Коррупцияга қарши курашиш агентлиги ходимлари ҳам эл–юрт фаровонлиги йўлида ўз фидойилигини намоён этмоқдалар. Улар меҳнати давлатимиз томонидан муносиб рағбатлантирилаётгани эса натижалар самарадорлигини шубҳасиз янада яхшилайди.

Тадбир сўнггида Агентликнинг 16 нафар ходимларига “Ўзбекистон Республикаси Мустақиллигининг 30 йиллиги” эсдалик нишони, шунингдек, фахрий ёрлиқ ва ташаккурномалар тантанали равишда топширилди.