Ўзбекистон Республикаси Президенти Шавкат Мирзиёев томонидан 2017–2021 йилларда мамлакатда коррупцияга қарши курашиш ва унинг олдини олиш бўйича турли соҳаларда амалга оширилган 10 та энг муҳим ислоҳотлар таҳлил қилинди. 

1. Парламентда Коррупцияга қарши курашиш бўйича махсус қўмиталар ташкил этилди

Олий Мажлис Қонунчилик палатаси ва Сенатида коррупцияга қарши курашиш бўйича махсус қўмиталар ҳамда давлат сиёсатини юритувчи мустақил тузилма – Коррупцияга қарши курашиш агентлиги ташкил этилди. Бу эса корруцпиянинг олдини олиш ва унга қарши курашиш масаласи парламентнинг доимий назоратида бўлишига хизмат қилмоқда.

2. Давлат хизматларини кўрсатиш тизими ислоҳ қилинди

Барча ҳудудларда жами 207 та давлат хизматлари марказлари ва уларнинг олис ҳудудлардаги 129 та филиаллари фаолияти йўлга қўйилди. Хизмат турлари 157 тага етказилиб, 70 дан зиёд давлат хизматларидан фойдаланиш тартиби соддалаштирилди. Давлат хизматларни кўрсатиш муддати ва талаб этиладиган ҳужжатлар сони ўртача 2 бараварга қисқартирилди.

3. Коррупциявий омилларни келтириб чиқарувчи ортиқча бюрократик тўсиқлар бартараф этилди

Хорижга чиқиш рухсатнома стикери бекор қилинди, Тошкент шаҳри ва Тошкент вилоятида доимий прописка қилиш тартиби ислоҳ қилинди. Фуқаролардан 30 га яқин турдаги маълумотномаларни талаб қилиш тақиқланди. Валюта бозори тўлиқ эркинлаштирилди.

Ер участкаларини фақатгина онлайн аукцион орқали сотиб олиш тартиби белгиланди.

Автомашиналар учун махсус авторақамларни онлайн-акцион орқали сотиш йўлга қўйилди.

4. Лицензия ва рухсатнома бериш тартиблари соддалаштирилди

Амалда бўлган лицензиялар ва рухсат бериш ҳужжатлари 30 фоизгача қисқартирилиб, 49  та лицензия, 120 та рухсат бериш ҳужжати ҳамда 33 та хабарноманинг якуний рўйхатлари тасдиқланди. Лицензиялаш ва рухсатнома олиш соҳасида интерактив хизматлар кўрсатиш учун “Лицензия” ахборот тизимлари мажмуаси www.license.gov.uz ишга туширилди.

5. Олий таълим тизимидаги коррупциявий хавф-хатарлар бартараф этилмоқда

Олий таълим муассасаларига қабул квоталари 3 бараварга оширилди.  Тест натижалари имтиҳон ўтказилган сананинг эртаси куни эълон қилиниши тартиби йўлга қўйилди. Бакалавриат ва магистратура (клиник ординатура) таълим йўналишларига қабул имтиҳонлар онлайн трансляция қилинмоқда.

Олий таълим муассасалари профессор ўқитувчиларининг ойлик маоши қарийб 4 бараварга оширилди.

6. Давлат органлари ва ташкилотлари фаолияти очиқлиги ва ҳисобдорлиги таъминланмоқда

33 турдаги ижтимоий аҳамиятга молик маълумотлар рўйхати тасдиқланди. Мас: давлат органлари балансидаги хизмат автомашиналар, мол-мулклар, хизмат сафарлари ва хориждан келган меҳмонларни кутиб олиш харажатлари юзасидан ҳисоботлар эълон қилиш мажбурий этиб белгиланди.

Очиқ маълумотлар портали (data.gov.uz), Ягона интерактив давлат хизматлари портали (my.gov.uz), “Очиқ бюджет” портали (openbudget.uz) каби платформалар яратилди ва ишга туширилди.

Фуқароларнинг давлат органлари ва ташкилотлари раҳбарларига тўғридан-тўғри мурожаат қилиш институти йўлга қўйилди.

7. Шаффоф давлат харидлари тизими яратилди

Давлат харидларини амалга оширишнинг мутлақо янги тизими йўлга қўйилди. Янги таҳрирдаги Ўзбекистон Республикаси “Давлат харидлари тўғрисида”ги қонуни қабул қилинди.

Бюджет маблағларининг самарали сарфланиши, талон-торожликка йўл қўймаслик бўйича доимий чоралар кўрилмоқда. Бюджет очиқлигини таъминлашга хизмат қилувчи d.xarid.uz, e-xarid.uz ва cooperation.uz каби махсус порталлар ишга туширилди.

8. Ишга қабул қилишнинг очиқ танлов механизми йўлга қўйилди

Ўзбекистон Республикаси Президенти ҳузурида Давлат хизматини ривожлантириш агентлиги ташкил этилди.

Давлат хизматига очиқ танлов асосида ишга қабул қилиш тизими яратилди. Портал орқали 3 мингга яқин фуқаролар ишга жойлашди.

2021 йил 1 сентябрдан барча давлат органлари ва ташкилотларига ишга қабул қилиш очиқ танлов асосида амалга оширилиши белгиланди.

9. “Коррупциясиз соҳа” лойиҳалари амалга оширилмоқда

Коррупциявий хавф-хатарлар юқори бўлган соҳалар — капитал қурилиш, олий таълим, соғлиқни сақлаш ва давлат харидлари тизимларида “Коррупциясиз соҳа” лойиҳалари амалга оширилмоқда. “Шаффоф қурилиш” миллий ахборот тизими, давлат харидлари бўйича ягона ахборот портали xarid.uz, ОТМларга қабул имтиҳон жараёнларини онлайн эфирга узатувчи imtihon.uz платформаси каби лойиҳалар амалга оширилди.

10. Барча давлат органлари ва ташкилотларида Коррупцияга қарши мувофиқлик тизимлари жорий этилмоқда

Коррупцияга қарши мувофиқлик “комплаенс-назорат” тизимини жорий этиш мақсадида коррупциявий хавф-хатарлар юқори бўлган 26 та вазирлик ва идораларда тажриба тариқасида коррупцияга қарши ички назорат бўлимлари ташкил этилди.

Натижада коррупциявий қонунбузилиш ҳолатлари, бюджет маблағларининг талон-тарож қилишини олди олинди ҳамда молиявий хато ва камчиликлар аниқланди.

2021 йил 1 октябрдан барча давлат идораларида коррупцияга қарши ички назорат тузилмалари ташкил этилди.