Жорий йилнинг 27-сентябрь куни Коррупцияга қарши курашиш агентлигида Ўзбекистонга ташриф буюрган Халқаро валюта жамғармаси миссияси раҳбари Рон ван Руден бошчилигидаги делегация билан учрашув бўлиб ўтди.

Учрашувда шунингдек, Жамғарманинг Ўзбекистондаги доимий вакили К.Росс иштирок этди.

Тадбирда дастлаб, Агентлик директори А.Бурханов томонидан Ўзбекистон Республикасининг коррупцияга қарши курашиш сиёсати, Агентлик ва Халқаро валюта жамғармаси вакиллари ўртасида жорий йилнинг 5-феврал куни ўтказилган учрашувдан кейинги даврда олиб борилган ислоҳотлар, шу жумладан “Давлат органлари ва ташкилотларининг фаолияти очиқлигини таъминлаш, шунингдек, жамоатчилик назоратини самарали амалга оширишга доир қўшимча чора-тадбирлар тўғрисида”ги Президент Фармони ҳамда Коррупцияга қарши курашиш бўйича 2021-2022-йилларга мўлжалланган давлат дастури доирасида Агентликка юклатилган янги вазифа ва функциялари таништирилди.

Халқаро ташкилот вакили Р.Руден томонидан коррупцияга қарши курашиш сиёсатининг олиб борилиши йўналишида жуда қисқа вақт ичида эришилган ютуқларга юқори баҳо берилди. Бундан ташқари, Жамғарма вакиллари томонидан давлат харидлари, декларациялаш, коррупцияга қарши курашиш соҳасида ўрнатилган халқаро алоқалар бўйича берилган саволларга батафсил жавоблар берилди.

Шунингдек, учрашув давомида давлат харидларини амалга ошириш ва ташқи қарзлардан фойдаланиш давомида коррупция хавф-хатарларининг олдини олишга қаратилган чора-тадбирларни ишлаб чиқиш ва Агентлик ходимларининг малакасини ошириш масалалари муҳокама қилинди.

Ўзаро мулоқот тарзида ташкил этилган мазкур учрашув якунида икки тараф вакиллари томонидан ҳамкорлик алоқаларини янада ривожлантириш ва коррупцияга қарши курашиш соҳасида таклифлар беришни давом эттириш юзасидан келишиб олинди.