Коррупцияга қарши курашиш агентлиги томонидан Словения савдо-саноат палатасида мазкур мамлакат тадбиркорлари учун Ўзбекистонда бизнес ва инвестиция муҳити, иқтисодий ислоҳотларга бағишланган тақдимот ўтказилди.

Словениянинг фармацевтика, оғир саноат, ахборот технологиялари, сервис ва логистика соҳасидаги йирик компаниялари иштирок этган тақдимот давомида Ўзбекистонда иқтисодиётни модернизация қилиш, бозор иқтисодиётига ўтиш жараёни жадаллашиб бораётгани алоҳида қайд этилди. Сўнгги йилларда инвестиция сиёсатига оид қонунчилик такомиллаштирилиб, чет эллик инвесторлар учун янги имкониятлар — жозибадор эркин иқтисодий ва саноат зоналари ташкил этилганлиги, инвестиция визалари жорий қилинганлиги, солиқ имтиёзлари ва бошқа преференциялар тақдим этилганлиги ҳақида маълумот берилди. 

Бундан ташқари, словениялик тадбиркорлар Ўзбекистонда давлат мулкини очиқ ва шаффоф хусусийлаштириш, чет эллик инвесторлар ҳуқуқ ва манфаатларини ҳимоя қилиш, корпоратив бошқарувнинг илғори тажрибаларини жорий қилиш, иқтисодиёт тармоқларида комплаенс назоратни босқичма-босқич татбиқ этиш бўйича амалга оширилаётган ишларга катта қизиқиш билдиришди.

Словениялик тадбиркорлар Ўзбекистондаги иқтисодий жараёнларда фаол иштирок этишга тайёр эканликлари, хусусан, коронавирус чекловлари сабабли сусайиб қолган ўзаро мулоқотларни яна фаоллаштириш, икки мамлакат тадбиркорлари, савдо-саноат палаталари ўртасида ҳамкорликни кучайтириш зарурлигини қайд этишди. Эътироф этилдики, Ўзбекистонда кечаётган туб ўзгаришлар инвесторлар учун катта имкониятлар эшигини очмоқда. 

Учрашувда словениялик тадбиркорларни қизиқтирган саволларга атрофлича жавоб берилиб, улар билан доимий мулоқотни давом эттиришга келишиб олинди.