Жорий йилнинг 8 февраль куни Агентлик ва Швейцариянинг Ўзбекистондаги элчихонаси вакиллари ўртасида учрашув бўлиб ўтди.

Учрашувда Агентлик директори Акмал Бурханов, элчи Константин Оболенский ҳамда икки томон масъул вакиллари иштирок этишди.

Маълумот учун: “Transparency International” халқаро ташкилотининг 2021 йилги “Коррупцияни қабул қилиш индекси”да Швейцария 7-ўринни эгаллаган.

Дастлаб, Агентлик томонидан коррупцияга қарши курашиш соҳасида олиб борилаётган ислоҳотлар ва ўзгаришлар, бунда Агентликнинг ўрни ва фаолияти ҳақида қисқача маълумот бериб ўтилди.

Элчи ўз ўрнида Ўзбекистонда коррупцияга қарши курашиш бўйича салмоқли чоралар кўрилаётганлиги, бунда тизимли ислоҳотлар олиб бориш муҳим роль ўйнашини, бундан ташқари аксилкоррупция йўналишидаги қонунчилик сезиларли даражада такомиллашганлигини ва коррупцияга қарши курашиш соҳасида жамоатчилик иштироки ҳамда давлат хизматида ахлоқий меъёрларга риоя этиш масалалари муҳим ўринга эгалигини таъкидлаб ўтди.

Учрашув якунида икки томонлама ҳамкорликни ривожлантириш мақсадида Коррупцияга қарши курашиш бўйича идоралараро ишчи гуруҳи (IDWG) билан тажриба ва ахборот алмашиш учун тўғридан-тўғри алоқаларни йўлга қўйиш, ўзаро қўшма лойиҳалар, семинар ва тренинглар ташкил этиш сингари таклифлар илгари сурилди.

Коррупцияга қарши курашиш агентлиги 

Ахборот хизмати