1992 йил 2 март куни янги суверен давлат — Ўзбекистон Республикаси Бирлашган Миллатлар Ташкилотининг тенг ҳуқуқли аъзосига айланди. 

Ўтган давр мобайнида кўплаб соҳа ва йўналишларда ўзаро ишончга асосланган ҳамкорлик алоқалари йўлга қўйилди. 
Коррупцияга қарши курашиш ҳам ҳамкорлик йўналишларидан бири ҳисобланади. Хусусан, 2008 йилда мамлакатимиз Бирлашган Миллатлар Ташкилотининг коррупцияга қарши конвенциясига қўшилди.

Коррупцияга қарши курашиш агентлиги ташкил этилиши натижасида ушбу йўналишдаги ҳамкорлик янги босқичга кўтарилди. Агентлик ташкил этилган илк кунлариданоқ БМТ ва унинг тармоқ ташкилотлари биргаликда ишлашга тайёр эканликларини маълум қилишди.

Бугунги Агентлик БМТ оиласининг БМТнинг Тараққиёт дастури (UNDP), БМТнинг Гиёҳванд моддалар ва жиноятчилик бўйича бошқармаси (UNODC), БМТ Болалар жамғармаси (UNICEF) каби ташкилотлари билан яқиндан ҳамкорлик қилиб келмоқда. 

Ушбу ташкилотлар билан ҳамкорликда лойиҳалар, турли хил тадбирларни ташкил этиш ва Агентлик ходимларининг салоҳиятини ошириш, экспертлик ёрдам кўрсатиш каби йўналишларда биргаликда ишлар ташкил этилган.

Сўнгги муҳим воқеалар қаторида БТМнинг Иқтисодий, ижтимоий ва маданий ҳуқуқлар қўмитасига Ўзбекистон томонидан берган ҳисоботи ҳам бор. Унда коррупцияга қарши курашиш масалалари ҳам кўтарилган бўлиб, Қўмита экспертлари томонидан Ўзбекистоннинг шартномавий мажбуриятларини бажариш бўйича кўрилаётган ижобий қадамларини юқори баҳолаб, Ўзбекистонда коррупцияга қарши ислоҳотларни амалга ошираётганини, жумладан, «Коррупцияга қарши кураш тўғрисида»ги Қонуннинг қабул қилинганлиги ва Коррупцияга қарши кураш агентлигининг ташкил этилганлиги эътироф этилди.

Коррупцияга қарши курашиш агентлиги
Ахборот хизмати