Коррупцияга қарши курашиш агентлиги масъул ходимлари Қурилиш соҳасидаги давлат дастурлари ижро этилишини назорат қилиш  ва  мувофиқлаштириш бўйича Республика штаби раҳбари ҳамда бошқа аъзолари, шунингдек, тегишли идоралар вакиллари билан биргаликда ҳудудларда давлат дастурларини амалга оширишда қонунбузилиш ҳолатларининг олдини олиш, бюджет маблағларини мақсадли ва самарали ишлатилиши ҳамда қурилиш-таъмирлаш ишларини сифатли бажарилишини таъминлаш бўйича амалга оширилаётган ишларни ўрганиш жараёнида иштирок этди. 

Ўрганиш ишлари Ўзбекистон Республикаси Президентининг 2021 йил 10 декабрдаги “Ўзбекистон Республикасининг ижтимоий ва ишлаб чиқариш инфратузилмасини ривожлантириш дастури ҳамда бошқа давлат дастурлари ижроси устидан назоратни кучайтиришга доир қўшимча чора-тадбирлар тўғрисида”ги ПҚ-43-сонли қарори ижросини таъминлаш мақсадида амалга оширилди. 

Республика штаби аъзолари жорий йилнинг 1 март куни Бухоро вилоятида бўлиб, Республика шошилинч тез ёрдам илмий маркази Бухоро филиали, Бухоро шаҳридаги универсал спорт мажмуаси, Олот туманидаги марказий касалхона физиотерапия бўлими ҳамда "Давлатбой" МФЙдаги "Бўрибек" қишлоқ врачлик пунктининг филиалида амалга оширилаётган қурилиш ишлари, шунингдек, Қоракўл тумани "Пойкент", "Сайёт", "Қулончи", "Шўробод" ва "Қоракўл" МФЙларда ичимлик сув тизимларини қуриш жараёнлари, Бухоро Давлат тиббиёт институтида амалга оширилаётган қурилиш-таъмирлаш тадбирлари билан танишишди.

Бундан ташқари, ўрганиш доирасида Ғиждувон туманидаги “Янги Ўзбекистон массиви” ҳамда Шофиркон тумани тиббиёт бирлашмасида олиб борилаётган қурилиш ишлари сифати кўздан кечирилди.

Тадбир жорий йилнинг 2-3 март кунлари Навоий вилоятида давом эттирилди. Ушбу манзилда  Қизилтепа тумани, “Айрончи” МФЙда 2021 йилда “Обод қишлоқ” Давлат дастури доирасида амалга оширилган ишлар, Қизилтепа туманидаги “Янги Ўзбекистон” массивида олиб борилаётган ишлар аҳволи, шунингдек, Навоий шаҳрида Республика шошилинч тез ёрдам илмий маркази филиалининг терапия бўлими, шаҳар тиббиёт бирлашмаси, қўғирчоқ театрининг қурилишлари билан танишилди. Нурота туманидаги бир неча объектлар -  Болалар ва ўсмирлар спорт мактаби, Маданият маркази биноси, “Чашма” зиёратгоҳида бажарилган ободонлаштириш тадбирлари,  Навбаҳор туманидан ўтувчи "Навоий-Нурота" автомобиль йўлини (4Р230 "А379 автомобиль йўли (10 км) Бешработ) реконструкция қилиш жараёни, Кармана туманидаги “Янги Ўзбекистон” массивида олиб борилаётган ишлар аҳволи ҳам кўздан кечирилди. 

Ўрганишларда давлат дастурларини ўз вақтида, тўлиқ ва сифатли амалга ошириш, маблағларнинг мақсадли ва самарали сарфланишини таъминлаш бўйича мутасадди раҳбарларга тегишли топшириқ ва кўрсатмалар берилди.
 

Коррупцияга қарши курашиш агентлиги
Ахборот хизмати