Korrupsiyaga qarshi kurashish agentligi masʼul xodimlari Qurilish sohasidagi davlat dasturlari ijro etilishini nazorat qilish  va  muvofiqlashtirish boʻyicha Respublika shtabi rahbari hamda  boshqa aʼzolari, shuningdek, tegishli idoralar vakillari bilan birgalikda  hududlarda davlat dasturlarini amalga oshirishda qonunbuzilish holatlarining oldini olish, byudjet mablagʻlarini maqsadli va samarali ishlatilishi hamda qurilish-taʼmirlash ishlarini sifatli bajarilishini taʼminlash boʻyicha amalga oshirilayotgan ishlarni oʻrganish jarayonida ishtirok etdi. 

Oʻrganish ishlari Oʻzbekiston Respublikasi Prezidentining 2021-yil 10-dekabrdagi “Oʻzbekiston Respublikasining ijtimoiy va ishlab chiqarish infratuzilmasini rivojlantirish dasturi hamda boshqa davlat dasturlari ijrosi ustidan nazoratni kuchaytirishga doir qoʻshimcha chora-tadbirlar toʻgʻrisida”gi PQ-43-sonli qarori ijrosini taʼminlash maqsadida amalga oshirildi. 

Respublika shtabi aʼzolari joriy yilning 1-mart kuni Buxoro viloyatida boʻlib, Respublika shoshilinch tez yordam ilmiy markazi Buxoro filiali, Buxoro shahridagi universal sport majmuasi, Olot tumanidagi markaziy kasalxona fizioterapiya boʻlimi hamda "Davlatboy" MFYdagi "Boʻribek" qishloq vrachlik punktining filialida amalga oshirilayotgan qurilish ishlari, shuningdek, Qorakoʻl tumani "Poykent", "Sayyot", "Qulonchi", "Shoʻrobod" va "Qorakoʻl" MFYlarda ichimlik suv tizimlarini qurish jarayonlari, Buxoro Davlat tibbiyot institutida amalga oshirilayotgan qurilish-taʼmirlash tadbirlari bilan tanishishdi.

Bundan tashqari,oʻrganish doirasida Gʻijduvon tumanidagi “Yangi Oʻzbekiston massivi” hamda Shofirkon tumani tibbiyot birlashmasida olib borilayotgan qurilish ishlari sifati koʻzdan kechirildi.

Tadbir joriy yilning 2-3-mart kunlari Navoiy viloyatida davom ettirildi. Ushbu manzilda  Qiziltepa tumani, “Ayronchi” MFYda 2021-yilda “Obod qishloq” Davlat dasturi doirasida amalga oshirilgan ishlar, Qiziltepa tumanidagi “Yangi Oʻzbekiston” massivida olib borilayotgan ishlar ahvoli, shuningdek, Navoiy shahrida Respublika shoshilinch tez yordam ilmiy markazi filialining terapiya boʻlimi, shahar tibbiyot birlashmasi, qoʻgʻirchoq teatrining qurilishlari bilan tanishildi. Nurota tumanidagi bir necha obyektlar -  Bolalar va oʻsmirlar sport maktabi, Madaniyat markazi binosi, “Chashma” ziyoratgohida bajarilgan obodonlashtirish tadbirlari, Navbahor tumanidan oʻtuvchi "Navoiy-Nurota" avtomobil yoʻlini (4R230 "A379 avtomobil yoʻli (10 km) Beshrabot) rekonstruksiya qilish jarayoni, Karmana tumanidagi “Yangi Oʻzbekiston” massivida olib borilayotgan ishlar ahvoli ham koʻzdan kechirildi. 

Oʻrganishlarda davlat dasturlarini oʻz vaqtida, toʻliq va sifatli amalga oshirish, mablagʻlarning maqsadli va samarali sarflanishini taʼminlash boʻyicha mutasaddi rahbarlarga tegishli topshiriq va koʻrsatmalar berildi.

Korrupsiyaga qarshi kurashish agentligi
Axborot xizmati