Жорий йилнинг 4 март куни Коррупцияга қарши курашиш агентлигида экспертлар иштирокида Коррупцияга қарши курашиш Академияси лойиҳасининг муҳокамаси ташкил этилди. 

Таъкидланганидек, Агентлик томонидан олиб борилган ўрганишлар ва таҳлиллар натижасида аҳоли ва давлат хизматчиларининг коррупцияга қарши курашиш соҳасидаги билимларини узлуксиз ошириш тизимини оширишга эҳтиёж бўлса-да, ушбу йўналишда ягона тизимли ёндашув ёки платформа мавжуд эмаслиги маълум бўлди. 

Шу боис 2022–2026 йилларга мўлжалланган Янги Ўзбекистоннинг тараққиёт стратегиясини “Инсон қадрини улуғлаш ва фаол маҳалла йили”да амалга оширишга оид Давлат Дастурининг 84-мақсад, 305-бандида Коррупцияга қарши курашиш академиясини ташкил этиш орқали соҳага доир ҳуқуқий билим ва онгни юксалтириш бўйича кенг қамровли тизимни жорий қилиш вазифаси юклатилди. 

Тадбир давомида Коррупцияга қарши курашиш Академияси лойиҳасининг тақдимоти ҳам бўлиб ўтди.

 Махсус ўқув платформасида коррупция тушунчаси ва унинг ижтимоий оқибатлари, жамиятда коррупцияга қарши муросасизлик кайфиятини шакллантирувчи ўқув методик қўлланмалар, илмий фаолият натижалари, коррупция ва манфаатлар тўқнашувини бартараф этишга қаратилган ташкилий-ҳуқуқий асосларни ўзида акс эттирган теле-, видео-, аудио-, кино маҳсулотлари ва мультипликацион роликлар билан таъминлаш кўзда тутилган. 

Академия лойиҳаси Япониянинг нуфузли университетларида таҳсил олиб қайтган экспертлар иштирокида атрофлича муҳокама этилди. 

Вазирлик ва идоралар, банк тизими, иқтисодиёт ҳамда мамлакатимиз олий таълим муассасаларида фаолият юритаётган экспертлар Академиянинг давлат хизматига ишга қабул қилиш ва лавозимдан лавозимга ўтиш ҳамда коррупцияни келтириб чиқарувчи бошқа  омилларнинг олдини олишга хизмат қилишини эътироф этган ҳолда хориж тажрибаси асосида лойиҳани янада такомиллаштириш бўйича ўз таклифларини билдиришди.

Йиғилиш якунида коррупциянинг олдини олишда экспертлик салоҳиятидан янада кенгроқ фойдаланишга келишиб олинди.

Коррупцияга қарши курашиш агентлиги
Ахборот хизмати