Жорий йилнинг 18 март куни Коррупцияга қарши курашиш агентлиги ҳамда Европада хавфсизлик ва ҳамкорлик ташкилоти вакиллари ўртасида учрашув ташкил этилди.

Учрашув давомида Агентлик раҳбарияти ва ЕХҲТнинг Ўзбекистондаги лойиҳалари координатори, элчи жаноблари Пьер фон Аркс ўртасида Ўзбекистон Республикаси Коррупцияга қарши курашиш агентлиги томонидан ЕХҲТнинг Ўзбекистондаги лойиҳалари координатори офиси билан ҳамкорликда 2022 йилда амалга ошириладиган чора-тадбирлар режасини имзолаш маросими бўлиб ўтди. 

Маълумот учун: 2021 йилнинг ноябрь ойида ЕХҲТнинг Иқтисодий ва экологик фаолияти бўйича мувофиқлаштирувчи идораси ва Ўзбекистон Республикаси Коррупцияга қарши курашиш Агентлиги ўртасида Ўзбекистонда рақамлаштириш ва очиқ маълумотлардан фойдаланиш орқали самарали бошқарувни ривожлантиришга қаратилган ўзаро англашув Меморандуми имзоланган.

Мазкур режага асосан икки томонлама алоқаларни янада мустаҳкамлаш, тажриба алмашиш, коррупцияга қарши курашиш ва олдини олиш тизимида очиқ маълумотлар билан боғлиқ ахборот технологияларини жорий этиш, шунингдек, давлат органлари ва ташкилотлари фаолиятининг очиқлиги ва шаффофлигини таъминлашга қаратилган лойиҳалар, семинар-тренинглар, ўқув дастурлар, стажировка  ва шу каби қўшма тадбирларни амалга ошириш кўзда тутилган.

Шунингдек, ушбу ҳужжат давлат органлари фаолиятининг шаффофлигини таъминлаш ва очиқлик сиёсатини таъминлашда давлат хизматчиларининг салоҳиятини ошириш орқали мамлакатда коррупцияга қарши курашиш бўйича Ўзбекистонда олиб борилаётган сиёсат ва ислоҳотларни қўллаб-қувватлашга хизмат қилади.

Коррупцияга қарши курашиш агентлиги

Ахборот хизмати