Joriy yilning 18-mart kuni Korrupsiyaga qarshi kurashish agentligi hamda Yevropada xavfsizlik va hamkorlik tashkiloti vakillari oʻrtasida uchrashuv tashkil etildi.

Uchrashuv davomida Agentlik rahbariyati va YXHTning Oʻzbekistondagi loyihalari koordinatori, elchi janoblari Pyer fon Arks oʻrtasida Oʻzbekiston Respublikasi Korrupsiyaga qarshi kurashish agentligi tomonidan YXHTning Oʻzbekistondagi loyihalari koordinatori ofisi bilan hamkorlikda 2022-yilda amalga oshiriladigan chora-tadbirlar rejasini imzolash marosimi boʻlib oʻtdi. 

Maʼlumot uchun: 2021-yilning noyabr oyida YXHTning Iqtisodiy va ekologik faoliyati boʻyicha muvofiqlashtiruvchi idorasi va Oʻzbekiston Respublikasi Korrupsiyaga qarshi kurashish Agentligi oʻrtasida Oʻzbekistonda raqamlashtirish va ochiq maʼlumotlardan foydalanish orqali samarali boshqaruvni rivojlantirishga qaratilgan oʻzaro anglashuv Memorandumi imzolangan.

Mazkur rejaga asosan ikki tomonlama aloqalarni yanada mustahkamlash, tajriba almashish, korrupsiyaga qarshi kurashish va oldini olish tizimida ochiq maʼlumotlar bilan bogʻliq axborot texnologiyalarini joriy etish, shuningdek, davlat organlari va tashkilotlari faoliyatining ochiqligi va shaffofligini taʼminlashga qaratilgan loyihalar, seminar-treninglar, oʻquv dasturlar, stajirovka  va shu kabi qoʻshma tadbirlarni amalga oshirish koʻzda tutilgan.

Shuningdek, ushbu hujjat davlat organlari faoliyatining shaffofligini taʼminlash va ochiqlik siyosatini taʼminlashda davlat xizmatchilarining salohiyatini oshirish orqali mamlakatda korrupsiyaga qarshi kurashish boʻyicha Oʻzbekistonda olib borilayotgan siyosat va islohotlarni qoʻllab-quvvatlashga xizmat qiladi.

Korrupsiyaga qarshi kurashish agentligi

Axborot xizmati