Жорий йилнинг 16 март куни Агентлик вакиллари Буюк Британиянинг Марказий Осиё бўйича минтақавий дастур менежери Пол Роббинсни қабул қилди.
Учрашувни ташкил этишдан мақсад Агентлик фаолиятининг устувор йўналишлари билан танишиш ва келгусидаги ҳамкорлик режаларини муҳокама қилиш бўлди.

Маълумот учун: 2021 йил 28 октябрь куни Агентлик, Буюк Британиянинг Ўзбекистондаги дипломатик ваколатхонаси ва Ҳукуматлараро Ҳамкорлик Хизмати ўртасида ўзаро англашув Меморандуми имзоланган. 
Учрашув аввалида Агентлик вакиллари томонидан Ўзбекистонда коррупцияга қарши курашиш соҳасида кўрилаётган чоралар, қабул қилинган норматив-ҳуқуқий ҳужжатлар, шунингдек Агентликнинг асосий вазифалари ва фаолияти юзасидан атрофлича маълумот бериб ўтилди.
Тадбир давомида Ўзбекистон ва Буюк Британия давлатлари ўртасида коррупциянинг олдини олиш ва унга қарши курашиш соҳасидаги илғор тажриба билан алмашиш, аҳолига коррупция ҳақида хабар бериш ва давлат ҳимоясида бўлиш имконини берувчи тизимларни жорий этишда ҳамкорлик қилиш, ваколатли идора ва ташкилотлари билан алоқаларни йўлга қўйиш, шунингдек, Агентлик ходимларининг салоҳиятини ошириш бўйича қўшма тадбирларни ташкил этиш масалалари муҳокама қилинди.

Учрашув якунида Британия томони соҳада қисқа муддатларда амалга оширилган ишлар кўлами кенглиги ва жамоатчилик вакилларининг мазкур жараёнларга жалб қилинишига эътибор қаратилаётганлигини алоҳида таъкидлаб, ўзаро манфаатли икки томонлама ҳамкорликни давом эттиришга  келишиб олдилар.

Коррупцияга қарши курашиш агентлиги

Ахборот хизмати