Joriy yilning 16-mart kuni Agentlik vakillari Buyuk Britaniyaning Markaziy Osiyo boʻyicha mintaqaviy dastur menejeri Pol Robbinsni qabul qildi.
Uchrashuvni tashkil etishdan maqsad Agentlik faoliyatining ustuvor yoʻnalishlari bilan tanishish va kelgusidagi hamkorlik rejalarini muhokama qilish boʻldi.

Maʼlumot uchun: 2021-yil 28-oktyabr kuni Agentlik, Buyuk Britaniyaning Oʻzbekistondagi diplomatik vakolatxonasi va Hukumatlararo Hamkorlik Xizmati oʻrtasida oʻzaro anglashuv Memorandumi imzolangan. 
Uchrashuv avvalida Agentlik vakillari tomonidan Oʻzbekistonda korrupsiyaga qarshi kurashish sohasida koʻrilayotgan choralar, qabul qilingan normativ-huquqiy hujjatlar, shuningdek Agentlikning asosiy vazifalari va faoliyati yuzasidan atroflicha maʼlumot berib oʻtildi.
Tadbirda Oʻzbekiston va Buyuk Britaniya davlatlari oʻrtasida korrupsiyaning oldini olish va unga qarshi kurashish sohasidagi ilgʻor tajriba bilan almashish, aholiga korrupsiya haqida xabar berish va davlat himoyasida boʻlish imkonini beruvchi tizimlarni joriy etishda hamkorlik qilish, vakolatli idora va tashkilotlari bilan aloqalarni yoʻlga qoʻyish, shuningdek, Agentlik xodimlarining salohiyatini oshirish boʻyicha qoʻshma tadbirlarni tashkil etish masalalari muhokama qilindi.

Uchrashuv yakunida Britaniya tomoni sohada qisqa muddatlarda amalga oshirilgan ishlar koʻlami kengligi va jamoatchilik vakillarining mazkur jarayonlarga jalb qilinishiga eʼtibor qaratilayotganligini alohida taʼkidlab, oʻzaro manfaatli ikki tomonlama hamkorlikni davom ettirishga  kelishib oldilar.

Korrupsiyaga qarshi kurashish agentligi

Axborot xizmati