Жорий йилнинг 23 март куни Коррупцияга қарши курашиш агентлиги директори А.Бурханов Ўзбекистон Республикаси Президентининг иқтисодий ривожланиш, самарали бошқарув ва халқаро ҳамкорлик масалалари бўйича маслаҳатчиси Сума Чакрабартини қабул қилди.

Учрашувда Агентлик директори коррупцияга қарши курашиш соҳасидаги сўнгги ўзгаришлар, амалга оширилган ислоҳотлар, қабул қилинган норматив-ҳуқуқий ҳужжатлар, қолаверса Агентликка юклатилган вазифалар, мамлакатда коррупция иллатини йўқ қилишда жорий этилаётган янги механизмлар ҳамда соҳани такомиллаштириш бўйича қилиниши лозим бўлган ишлар тўғрисида маълумот бериб ўтди.
Маълумот учун: 2021 йилнинг июль-сентябрь ойлари давомида Агентлик ҳамда Ўзбекистон Республикаси Президенти маслаҳатчиси С.Чакрабартининг Ўзбекистондаги идораси вакиллари иштирокида онлайн ва оффлайн учрашувлар бўлиб ўтган эди.        

Шунингдек, С.Чакрабарти ва халқаро экспертлар томонидан коррупцияга қарши курашиш соҳасида қисқа давр ичида амалга оширилган ишлар юқори баҳоланиб, Агентлик фаолиятини янада такомиллаштириш бўйича экспертлик ёрдамини тақдим этиш юзасидан келишувга эришилди. Жумладан, Агентлик ваколатлари ҳамда салоҳиятини мустақил баҳолашда амалий ёрдам кўрсатилишини таъкидладилар.

Ўзаро мулоқот тарзида ташкил этилган мазкур учрашув якунида томонлар соҳадаги устувор йўналишларни амалиётга тадбиқ этилиши борасида доимий иш олиб боришга келишиб олдилар.

Коррупцияга қарши курашиш агентлиги

Ахборот хизмати