Жорий йилнинг 6 апрель куни Миллий матбуот марказида 2022 — 2026 йилларга мўлжалланган Янги Ўзбекистоннинг тараққиёт стратегияси ва уни “Инсон қадрини улуғлаш ва фаол маҳалла йили”да амалга оширишга оид давлат дастури ижросини таъминлашда Коррупцияга қарши курашиш агентлиги томонидан олиб борилаётган ишлар юзасидан матбуот анжумани бўлиб ўтди.

Унда Агентлик масъул ходимлари, ОАВ вакиллари ҳамда блогерлар иштирок этди.

Таъкидланганидек, Давлат дастурида Агентликка  жами 7 та бандда 9 та вазифани ижро этиш вазифаси қўйилган. Жумладан, муҳим ижтимоий-масалалар бўйича очиқ маълумотлар доирасини янада кенгайтириш ва мазкур маълумотлардан тўсиқларсиз фойдаланишни таъминлаш юзасидан норматив-ҳуқуқий ҳужжат лойиҳасини ишлаб чиқиш вазифаси белгиланган.

Мазкур норматив ҳуқуқий ҳужжат лойиҳасини тайёрлаш жараёнида Агентлик томонидан очиқ маълумотларнинг доирасини янада кенгайтириш ҳамда мазкур маълумотлардан тўсиқларсиз фойдаланиш механизмларини яратишга эътибор қаратилди.

Давлат хизматида манфаатлар тўқнашуви ҳақида хабар бериш ва уни ҳал этиш тизимини жорий этиш юзасидан ташкилий чора-тадбирларни ишлаб чиқиш бўйича Агентлик томонидан барча вазирлик, идораларда манфаатлар тўқнашуви ҳақида хабар бериш ва уни ҳал этиш тизимини жорий этишга қаратилган чора-тадбирлар лойиҳаси ишлаб чиқилди.

Лойиҳада манфаатлар тўқнашувини тартибга солишнинг ташкилий-ҳуқуқий асосини ишлаб чиқиш,  манфаатлар тўқнашуви ҳақида хабар бериш тартибини йўлга қўйиш, манфаатлар тўқнашуви ҳақидаги маълумотларни ошкор қилиш механизмларини яратиш каби бир қатор масалалар назарда тутилмоқда. 

Шунингдек, Давлат дастури доирасида Адлия вазирлиги билан ҳамкорликда «Е-антикоррупция» лойиҳасини амалга ошириш юзасидан Президент қарори лойиҳаси ишлаб чиқилди.  Бундан ташқари, манфаатдор вазирлик ва идоралар билан ҳамкорликда Коррупцияга мойил соҳаларнинг очиқлиги ва шаффофлигини таъминлаш, бунга кенг жамоатчиликни жалб этишга қаратилган “Йўл харитаси” тасдиқланди.

Бугунги кунда “Йўл харитаси” ижрога қаратилган, Агентлик унинг самарадорлиги устидан доимий назорат ўрнатган.

Ушбу вазифа ижросини тўлиқ таъминлаш мақсадида Агентлик ҳузурида ташкил этилган Жамоатчилик назоратини ривожлантириш жамғармаси маблағлари ҳисобидан нодавлат нотижорат ташкилотлари, фуқаролик жамиятининг бошқа институтлари учун коррупцияга мойил соҳаларда тадқиқотлар ва ижтимоий сўров ўтказишни назарда тутувчи грант танловларини ўтказиш режалаштирилмоқда.

Агентлик томонидан Давлат дастурига мувофиқ,  Коррупцияга қарши курашиш амалиётига тизимли превентив чораларни кучайтириш юзасидан амалга оширилиши лозим бўлган чора-тадбирлар лойиҳаси ишлаб чиқилди.

Шунингдек, аҳоли ва давлат хизматчиларининг коррупцияга қарши курашиш соҳасидаги билимларини узлуксиз ошириш мақсадида манфаатдор вазирлик ва идоралар билан ҳамкорликда хориж тажрибаси ўрганилиб,  “Коррупцияга қарши курашиш виртуал академияси”ни жорий этиш ва Давлат хизматчиларини коррупцияга қарши миллий сертификациялаш тартибини татбиқ этиш юзасидан Президент қарори лойиҳаси ишлаб чиқилди.

Мазкур лойиҳа асосида ўқишларни онлайн тарзда масофадан туриб махсус электрон ўқув платформа орқали амалга оширилиши, ҳар бир тингловчи курсларнинг боши ва охирида (кириш ва якуний) онлайн тест топшириши, курс якуни бўйича ижобий балл тўплаган тингловчиларга сертификат тақдим этилиши кўзда тутилган.

Матбуот анжуманида Агентлик томонидан жорий йилнинг I-чорагида амалга оширилган ишлар юзасидан ҳам маълумот берилди.

 Қайд этилганидек, 2022 йил 12 январь куни Ўзбекистон Республикаси Президентининг “Коррупцияга қарши курашиш ишларининг самарадорлигини рейтинг баҳолаш тизимини жорий этиш чора-тадбирлари тўғрисида”ги ПҚ-81-сонли қарори қабул қилинди. Коррупцияга қарши курашиш агентлиги ҳамда БМТ Тараққиёт дастури билан ҳамкорликда ишлаб чиқилган мазкур қарор билан Коррупцияга қарши курашиш ишларининг самарадорлигини рейтинг баҳолаш тизими жорий этилмоқда.

Баҳолаш ишлаб чиқилган махсус индикаторлар асосида “E-Anticor.uz” электрон платформаси орқали амалга оширилади ва ҳар йили 1 мартга қадар кенг жамоатчилик учун оммавий ахборот воситаларида эълон қилиб борилади. Ҳар йили олдинги йилнинг 1 январидан баҳоланиш ўтказилаётган йилнинг 1 январига қадар бўлган давр баҳолаш тизими билан қамраб олинади.

Анжуманда Агентлик томонидан Давлат дастури ижросини таъминлаш мақсадида белгиланган вазифаларни ўз вақтида, тўлиқ ва сифатли амалга ошириш чоралари давом эттирилиши ҳамда уларнинг натижаси бўйича ОАВга мунтазам ахборот бериб борилиши таъкидланди.

Коррупцияга қарши курашиш агентлиги

Ахборот хизмати