Joriy yilning 6 aprel kuni Milliy matbuot markazida 2022 — 2026 yillarga mo‘ljallangan Yangi O‘zbekistonning taraqqiyot strategiyasi va uni “Inson qadrini ulug‘lash va faol mahalla yili”da amalga oshirishga oid davlat dasturi ijrosini ta’minlashda Korrupsiyaga qarshi kurashish agentligi tomonidan olib borilayotgan ishlar yuzasidan matbuot anjumani bo‘lib o‘tdi.

Unda Agentlik mas’ul xodimlari, OAV vakillari hamda blogerlar ishtirok etdi.

Ta’kidlanganidek, Davlat dasturida Agentlikka  jami 7 ta bandda 9 ta vazifani ijro etish vazifasi qo‘yilgan. Jumladan, muhim ijtimoiy-masalalar bo‘yicha ochiq ma’lumotlar doirasini yanada kengaytirish va mazkur ma’lumotlardan to‘siqlarsiz foydalanishni ta’minlash yuzasidan normativ-huquqiy hujjat loyihasini ishlab chiqish vazifasi belgilangan.

Mazkur normativ huquqiy hujjat loyihasini tayyorlash jarayonida Agentlik tomonidan ochiq ma’lumotlarning doirasini yanada kengaytirish hamda mazkur ma’lumotlardan to‘siqlarsiz foydalanish mexanizmlarini yaratishga e’tibor qaratildi.

Davlat xizmatida manfaatlar to‘qnashuvi haqida xabar berish va uni hal etish tizimini joriy etish yuzasidan tashkiliy chora-tadbirlarni ishlab chiqish bo‘yicha Agentlik tomonidan barcha vazirlik, idoralarda manfaatlar to‘qnashuvi haqida xabar berish va uni hal etish tizimini joriy etishga qaratilgan chora-tadbirlar loyihasi ishlab chiqildi.

Loyihada manfaatlar to‘qnashuvini tartibga solishning tashkiliy-huquqiy asosini ishlab chiqish,  manfaatlar to‘qnashuvi haqida xabar berish tartibini yo‘lga qo‘yish, manfaatlar to‘qnashuvi haqidagi ma’lumotlarni oshkor qilish mexanizmlarini yaratish kabi bir qator masalalar nazarda tutilmoqda. 

Shuningdek, Davlat dasturi doirasida Adliya vazirligi bilan hamkorlikda «E-antikorrupsiya» loyihasini amalga oshirish yuzasidan Prezident qarori loyihasi ishlab chiqildi.  Bundan tashqari, manfaatdor vazirlik va idoralar bilan hamkorlikda Korrupsiyaga moyil sohalarning ochiqligi va shaffofligini ta’minlash, bunga keng jamoatchilikni jalb etishga qaratilgan “Yo‘l xaritasi” tasdiqlandi.

Bugungi kunda “Yo‘l xaritasi” ijroga qaratilgan, Agentlik uning samaradorligi ustidan doimiy nazorat o‘rnatgan.

Ushbu vazifa ijrosini to‘liq ta’minlash maqsadida Agentlik huzurida tashkil etilgan Jamoatchilik nazoratini rivojlantirish jamg‘armasi mablag‘lari hisobidan nodavlat notijorat tashkilotlari, fuqarolik jamiyatining boshqa institutlari uchun korrupsiyaga moyil sohalarda tadqiqotlar va ijtimoiy so‘rov o‘tkazishni nazarda tutuvchi grant tanlovlarini o‘tkazish rejalashtirilmoqda.

Agentlik tomonidan Davlat dasturiga muvofiq,  Korrupsiyaga qarshi kurashish amaliyotiga tizimli preventiv choralarni kuchaytirish yuzasidan amalga oshirilishi lozim bo‘lgan chora-tadbirlar loyihasi ishlab chiqildi.

Shuningdek, aholi va davlat xizmatchilarining korrupsiyaga qarshi kurashish sohasidagi bilimlarini uzluksiz oshirish maqsadida manfaatdor vazirlik va idoralar bilan hamkorlikda xorij tajribasi o‘rganilib, “Korrupsiyaga qarshi kurashish virtual akademiyasi”ni joriy etish va Davlat xizmatchilarini korrupsiyaga qarshi milliy sertifikatsiyalash tartibini tatbiq etish yuzasidan Prezident qarori loyihasi ishlab chiqildi.

Mazkur loyiha asosida o‘qishlarni onlayn tarzda masofadan turib maxsus elektron o‘quv platforma orqali amalga oshirilishi, har bir tinglovchi kurslarning boshi va oxirida (kirish va yakuniy) onlayn test topshirishi, kurs yakuni bo‘yicha ijobiy ball to‘plagan tinglovchilarga sertifikat taqdim etilishi ko‘zda tutilgan.

Matbuot anjumanida Agentlik tomonidan joriy yilning I-choragida amalga oshirilgan ishlar yuzasidan ham ma’lumot berildi.

 Qayd etilganidek, 2022 yil 12 yanvar kuni O‘zbekiston Respublikasi Prezidentining “Korrupsiyaga qarshi kurashish ishlarining samaradorligini reyting baholash tizimini joriy etish chora-tadbirlari to‘g‘risida”gi PQ-81-sonli qarori qabul qilindi. Korrupsiyaga qarshi kurashish agentligi hamda BMT Taraqqiyot dasturi bilan hamkorlikda ishlab chiqilgan mazkur qaror bilan Korrupsiyaga qarshi kurashish ishlarining samaradorligini reyting baholash tizimi joriy etilmoqda.

Baholash ishlab chiqilgan maxsus indikatorlar asosida “E-Anticor.uz” elektron platformasi orqali amalga oshiriladi va har yili 1 martga qadar keng jamoatchilik uchun ommaviy axborot vositalarida e’lon qilib boriladi. Har yili oldingi yilning 1 yanvaridan baholanish o‘tkazilayotgan yilning 1 yanvariga qadar bo‘lgan davr baholash tizimi bilan qamrab olinadi.

Anjumanda Agentlik tomonidan Davlat dasturi ijrosini ta’minlash maqsadida belgilangan vazifalarni o‘z vaqtida, to‘liq va sifatli amalga oshirish  choralari davom ettirilishi hamda ularning natijasi bo‘yicha OAVga muntazam axborot berib borilishi ta’kidlandi.

Korrupsiyaga qarshi kurashish agentligi

Axborot xizmati