Жорий йилнинг 12 апрель куни Коррупцияга қарши курашиш агентлиги раҳбарияти ва Бирлашган Миллатлар Ташкилотининг Гиёҳванд моддалар ва жиноятчилик бўйича бошқармаси (БМТ ГЖБ) Марказий Осиё бўйича Минтақавий идорасининг аксилкоррупция соҳасидаги экспертлари ўртасида учрашув бўлиб ўтди.

Учрашувда Ўзбекистон Республикаси ва БМТ ГЖБ ўртасида 2022-2025 йилларга мўлжалланган ҳамкорликни янада ривожлантириш бўйича "Йўл харитаси"да белгиланган вазифа ва чора-тадбирларни амалга ошириш юзасидан муҳокамалар олиб борилди.

Жумладан, коррупцияга қарши курашиш халқаро стандартларига ва Жакарта тамойилларига Ўзбекистон қонунчилигининг мувофиқлиги, Минтақавий Аксилкоррупция хабининг ташкил этилиши, мамлакатдаги давлат идораларининг БМТ ГЖБнинг “GRACE” ташаббусида иштирок этиши масалалари муҳокама қилинди.

Маълумот учун: Бугунги кунда Ўзбекистонда БМТнинг Коррупцияга қарши Конвенциясининг навбатдаги обзор жараёнлари давом этмоқда. Мазкур жараёнларни юқори даражада ташкил этиш мақсадида Агентлик директори ва Бош прокурор раҳбарлигида алоҳида боблар бўйича ишчи гуруҳлар тузилган. Ушбу тадбирларга БМТ экспертлари билан бирга Нигерия ва Мальдив ҳукумат вакиллари халқаро экспертлар сифатида жалб этилган.

Табдир давомида ҳамкорликнинг аниқ йўналишлари ўзида акс эттирган “Ҳамкорлик режа”сини ишлаб чиқиш ва унда коррупцияга қарши курашишда фуқаролик жамияти институтлари, бизнес ҳамжамияти ва ОАВ вакилларининг ролини ошириш масалаларига эътибор қаратиш лозимлиги таъкидланди.

Ўз ўрнида, Минтақавий маслаҳатчи В.Козин томонидан Агентликнинг таклифлари қўллаб-қувватланиб, жорий этилаётган янги механизмлар, жумладан, коррупцияга қарши курашиш бўйича билим ва кўникмаларни ошириш бўйича амалга оширилаётган ишлар юқори баҳоланди. 

Бундан ташқари, БМТ ГЖБ экспертлари томонидан коррупцияга қарши курашиш бўйича биргаликдаги саъй-ҳаракатларни амалга ошириш орқали мамлакатнинг иқтисодий салоҳиятини ошириш бўйича ишбилармон доиралар учун ҳам лойиҳаларни амалга оширишда амалий ёрдам кўрсатилиши маълум қилинди.

Учрашув сўнггида томонлар биргаликда самарали ҳамкорликни давом эттиришга умид билдирдилар.

Коррупцияга қарши курашиш агентлиги
Ахборот хизмати