Joriy yilning 12-aprel kuni Korrupsiyaga qarshi kurashish agentligi rahbariyati va Birlashgan Millatlar Tashkilotining Giyohvand moddalar va jinoyatchilik boʻyicha boshqarmasi (BMT GJB) Markaziy Osiyo boʻyicha Mintaqaviy idorasining aksilkorrupsiya sohasidagi ekspertlari oʻrtasida uchrashuv boʻlib oʻtdi.

Uchrashuvda Oʻzbekiston Respublikasi va BMT GJB oʻrtasida 2022-2025 yillarga moʻljallangan hamkorlikni yanada rivojlantirish boʻyicha "Yoʻl xaritasi"da belgilangan vazifa va chora-tadbirlarni amalga oshirish yuzasidan muhokamalar olib borildi.

Jumladan, korrupsiyaga qarshi kurashish xalqaro standartlariga va Jakarta tamoyillariga Oʻzbekiston qonunchiligining muvofiqligi, Mintaqaviy Aksilkorrupsiya xabining tashkil etilishi, mamlakatdagi davlat idoralarining BMT GJBning “GRACE” tashabbusida ishtirok etishi masalalari muhokama qilindi.

Maʼlumot uchun: Bugungi kunda Oʻzbekistonda BMTning Korrupsiyaga qarshi Konvensiyasining navbatdagi obzor jarayonlari davom etmoqda. Mazkur jаrayonlarni yuqori darajada tashkil etish maqsadida Agentlik direktori va Bosh prokuror rahbarligida alohida boblar boʻyicha ishchi guruhlar tuzilgan. Ushbu tadbirlarga BMT ekspertlari bilan birga Nigeriya va Maldiv hukumat vakillari xalqaro ekspertlar sifatida jalb etilgan.

Tabdir davomida hamkorlikning aniq yoʻnalishlari oʻzida aks ettirgan “Hamkorlik reja”sini ishlab chiqish va unda korrupsiyaga qarshi kurashishda fuqarolik jamiyati institutlari, biznes hamjamiyati va OAV vakillarining rolini oshirish masalalariga eʼtibor qaratish lozimligi taʼkidlandi.

Oʻz oʻrnida, Mintaqaviy maslahatchi V.Kozin tomonidan Agentlikning takliflari qoʻllab-quvvatlanib, joriy etilayotgan yangi mexanizmlar, jumladan, korrupsiyaga qarshi kurashish boʻyicha bilim va koʻnikmalarni oshirish boʻyicha amalga oshirilayotgan ishlar yuqori baholandi. 

Bundan tashqari, BMT GJB ekspertlari tomonidan korrupsiyaga qarshi kurashish boʻyicha birgalikdagi saʼy-harakatlarni amalga oshirish orqali mamlakatning iqtisodiy salohiyatini oshirish boʻyicha ishbilarmon doiralar uchun ham loyihalarni amalga oshirishda amaliy yordam koʻrsatilishi maʼlum qilindi.

Uchrashuv soʻnggida tomonlar birgalikda samarali hamkorlikni davom ettirishga umid bildirdilar.

Korrupsiyaga qarshi kurashish agentligi

Axborot xizmati