Жорий йилнинг 14 апрель куни Коррупцияга қарши курашиш агентлиги раҳбарияти АҚШ Давлат департаментининг Халқаро наркотик моддалар ва ҳуқуқни муҳофаза қилиш ишлари бўйича бюроси (INL) катта маслаҳатчиси  Дж.Каллаханни қабул қилди.

Маълумот учун: Халқаро наркотик моддалар ва ҳуқуқни муҳофаза қилиш ишлари бўйича бюроси (INL) АҚШ Давлат департаменти тузилмаси ҳисобланиб, халқаро наркотик моддалар ва жиноятчиликка қарши кураш сиёсати ва дастурларини ишлаб чиқиш бўйича ҳамкор давлат хавфсизлик кучларини тайёрлашда муҳим роль ўйнайди. 

Шунингдек, 2021 йилнинг декабрь ойида АҚШда Коррупцияга қарши курашиш бўйича Миллий стратегия қабул қилинган эди. Мазкур Стратегия коррупциянинг трансмиллий ўлчовларини яхшироқ тушуниш ва уларга жавоб беришга, шу жумладан, коррупция субъектларининг активларни яшириш ва ноқонуний фаолиятдан олинган даромадларни легаллаштириш учун АҚШ ва халқаро молиявий тизимлардан фойдаланиш имкониятларини камайтириш бўйича қўшимча чоралар кўришга қаратилган.

Мулоқотлар давомида томонлар ҳар икки давлатнинг коррупцияга қарши курашиш сиёсатидаги тенденциялар юзасидан маълумот алмашдилар. Хусусан, Агентлик томонидан 2022 — 2026 йилларга мўлжалланган Янги Ўзбекистоннинг тараққиёт стратегияси ва уни амалга оширишга оид давлат дастури, қолаверса бу борада қабул қилинган сўнгги меъёрий ҳужжатлар билан таништириб ўтилди. Ўз навбатида, америкалик ҳамкасблар АҚШда кўрилаётган чоралар, жумладан, Стратегия ҳақидаги янгиликлар билан ўртоқлашдилар.

Шунингдек, учрашувда Агентлик томонидан Виртуал Академияни ташкил этишда техник кўмак кўрсатиш, Ўзбекистонда Коррупцияга қарши курашиш Минтақавий марказ (Хаб) фаолиятини йўлга қўйишда яқиндан ҳамкорлик қилиш таклифлари илгари сурилди.
Бундан ташқари, Агентлик ходимлари ва давлат хизматчиларининг малакаси ва салоҳиятини ошириш мақсадида хорижда коррупцияга қарши курашиш бўйича махсус ўқув курсларини ташкил этиш ҳамда Ўзбекистон делегациясининг АҚШга хизмат сафарини амалга ошириш,  ўзаро ҳамкорлик йўналишларини белгилаш, қўшма тадбирлар ва лойиҳаларни амалга ошириш юзасидан фикр алмашилди.

Коррупцияга қарши курашиш aгентлиги

Aхборот хизмати