Ўзбекистон делегацияси вакиллари ташриф доирасида Массачусетс Бош инспектори Гленн Кунҳа билан учрашди. 

Маълумот учун: Бош инспектор идораси фирибгарлик, суиистеъмоллик, давлат мулки ва маблағларини талон-торож қилишнинг олдини олиш ва аниқлаш ҳамда давлат харидларида шаффофлик ва самарадорликни таъминловчи мустақил агентликдир.

Мулоқотда вакилларимиз Коррупцияга қарши курашиш агентлигининг давлат харидларининг амалга оширилиши ва бюджет маблағларининг мақсадли сарфланиши устидан назорат борасидаги фаолияти хусусида тўхталиб ўтдилар. 

Ўз навбатида, Бош инспектор Г.Кунҳа ўзи раҳбарлик қилаётган идоранинг ваколатлари, хусусан, суиистеъмолчилик, давлат мулки ва маблағлари талон-торож қилинишининг олдини олиш ва аниқлаш бўйича амалга оширилаётган чора-тадбирлар ҳақида маълумот берди. 

Жумладан, давлат идоралари фаолиятини мониторинг қилишнинг рақамли механизмлари, бюджет маблағларини ўзлаштириш ҳақида маълумот олиш каналлари, мазкур масалада Бош инспекторга мурожаат қилувчиларни ҳимоя қилиш тизими ва мурожаатларни  кўриб чиқиш тартиби хусусида сўз юритди. Коррупциянинг  олдини олиш бўйича ишлаб чиқилган қўлланмалар ва ташкил этилган ўқув курслари, уларни яратиш методологиясига оид маълумотлар ҳам вакилларимизда катта қизиқиш уйғотди. 

Томонлар давлат ҳокимияти ва бошқаруви органлари фаолиятининг очиқлиги ва шаффофлигини таъминлаш ҳамда бюджет маблағларидан оқилона фойдаланиш борасида ўзаро ҳамкорлик қилишга келишиб олдилар.

Шу каби мулоқот АҚШ Давлат этика комиссияси ижрочи директори Девид Уилсон билан ҳам ўтказилди. 

Маълумот учун: АҚШ Давлат этика комиссиясининг асосий миссияси давлат хизматининг барча даражаларида ҳалолликни таъминлаш, аҳолининг ушбу хизматга бўлган ишончини мустаҳкамлаш, шахсий манфаатлар ва давлат олдидаги бурчлар ўртасидаги зиддиятларнинг олдини олишга қаратилган.  Жумладан, молиявий маълумотларни ошкор қилиш, манфаатлар тўқнашуви ва порахўрлик тўғрисидаги қонунларга риоя қилиниши устидан назоратни амалга оширади. 

Учрашувда мамлакатда манфаатлар тўқнашувининг олдини олиш бўйича кўрилаётган асосий чора-тадбирларга эътибор қаратилди. Шунингдек, икки томон вакиллари давлат хизматида ҳалолликни назорат қилиш, давлат мансабдор шахсларининг молиявий маълумотларини ошкор қилиш бўйича олиб борилаётган ишлар борасида  ўз тажрибалари билан ўртоқлашдилар. 

Д.Уилсон делегация вакилларини Комиссия фаолияти самарадорлигини баҳолаш кўрсаткичлари, фаолиятни мониторинг қилиш ва баҳолаш амалиёти бўйича тажрибаси билан ҳам яқиндан таништирди. 
Учрашув якунида америка томони кўмагида Ўзбекистонда манфаатлар тўқнашуви соҳасида ўқув платформани яратишга келишиб олинди.

Коррупцияга қарши курашиш агентлиги

Ахборот хизмати