Oʻzbekiston delegatsiyasi vakillari tashrif doirasida Massachusets Bosh inspektori Glenn Kunha bilan uchrashdi. 

Maʼlumot uchun: Bosh inspektor idorasi firibgarlik, suiisteʼmollik, davlat mulki va mablagʻlarini talon-toroj qilishning oldini olish va aniqlash hamda davlat xaridlarida shaffoflik va samaradorlikni taʼminlovchi mustaqil agentlikdir.

Muloqotda vakillarimiz Korrupsiyaga qarshi kurashish agentligining davlat xaridlarining amalga oshirilishi va byudjet mablagʻlarining maqsadli sarflanishi ustidan nazorat borasidagi faoliyati xususida toʻxtalib oʻtdilar. 

Oʻz navbatida, Bosh inspektor G.Kunha oʻzi rahbarlik qilayotgan idoraning vakolatlari, xususan, suiisteʼmolchilik, davlat mulki va mablagʻlari talon-toroj qilinishining oldini olish va aniqlash boʻyicha amalga oshirilayotgan chora-tadbirlar haqida maʼlumot berdi. 

Jumladan, davlat idoralari faoliyatini monitoring qilishning raqamli mexanizmlari, byudjet mablagʻlarini oʻzlashtirish haqida maʼlumot olish kanallari, mazkur masalada Bosh inspektorga murojaat qiluvchilarni himoya qilish tizimi va murojaatlarni  koʻrib chiqish tartibi xususida soʻz yuritdi. Korrupsiyaning  oldini olish boʻyicha ishlab chiqilgan qoʻllanmalar va tashkil etilgan oʻquv kurslari, ularni yaratish metodologiyasiga oid maʼlumotlar ham vakillarimizda katta qiziqish uygʻotdi. 

Tomonlar davlat hokimiyati va boshqaruvi organlari faoliyatining ochiqligi va shaffofligini taʼminlash hamda byudjet mablagʻlaridan oqilona foydalanish borasida oʻzaro hamkorlik qilishga kelishib oldilar.

Shu kabi muloqot AQSH Davlat etika komissiyasi ijrochi direktori Devid Uilson bilan ham oʻtkazildi. 

Maʼlumot uchun: AQSH Davlat etika komissiyasining asosiy missiyasi davlat xizmatining barcha darajalarida halollikni taʼminlash, aholining ushbu xizmatga boʻlgan ishonchini mustahkamlash, shaxsiy manfaatlar va davlat oldidagi burchlar oʻrtasidagi ziddiyatlarning oldini olishga qaratilgan.  Jumladan, moliyaviy maʼlumotlarni oshkor qilish, manfaatlar toʻqnashuvi va poraxoʻrlik toʻgʻrisidagi qonunlarga rioya qilinishi ustidan nazoratni amalga oshiradi. 

Uchrashuvda mamlakatda manfaatlar toʻqnashuvining oldini olish boʻyicha koʻrilayotgan asosiy chora-tadbirlarga eʼtibor qaratildi. Shuningdek, ikki tomon vakillari davlat xizmatida halollikni nazorat qilish, davlat mansabdor shaxslarining moliyaviy maʼlumotlarini oshkor qilish boʻyicha olib borilayotgan ishlar borasida  oʻz tajribalari bilan oʻrtoqlashdilar. 

D.Uilson delegatsiya vakillarini Komissiya faoliyati samaradorligini baholash koʻrsatkichlari, faoliyatni monitoring qilish va baholash amaliyoti boʻyicha tajribasi bilan ham yaqindan tanishtirdi. 
Uchrashuv yakunida amerika tomoni koʻmagida Oʻzbekistonda manfaatlar toʻqnashuvi sohasida oʻquv platformani yaratishga kelishib olindi.

Korrupsiyaga qarshi kurashish agentligi
Axborot xizmati