АҚШга амалий ташрифнинг сўнгги кунида Ўзбекистон делегацияси ҳамда Қўшма Штатларнинг Федерал суд маркази раҳбарияти ўртасида учрашув бўлиб ўтди.  

Маълумот учун: Федерал суд маркази АҚШ суд тизимининг тадқиқот ва таълим агентлиги ҳисобланади. Марказ одил судловни самарали амалга ошириш ва суд ҳокимияти мустақиллигини таъминлашга кўмаклашади,  суд бошқарувини такомиллаштириш йўллари бўйича танқидий ва таҳлилий ўрганишлар олиб боради. 

2021 йилда Агентлик ва АҚШ Федерал суд маркази ўртасида учрашув бўлиб ўтган ва унда томонлар келгусида ҳамкорлик бўйича келишувга эришишган.

Учрашувда таъкидланганидек, Федерал суд маркази суд тизими учун суд бошқаруви, ишларни бошқариш, бюджет ва молия, инсон ресурслари ва суд-экспертиза технологиялари каби кенг кўламли соҳаларда ўқитиш ва тадқиқот ишларини олиб боради. Марказ судьялар ва бошқа суд тизими ходимлари учун касбий йўналиш ва узлуксиз таълим дастурларини тайёрлайди. 

Шунга кўра, томонлар ўртасидаги  мулоқот АҚШда судьяларни одоб-аҳлоқ ва коррупцияга қарши ўқитиш тизими, Марказнинг коррупцияга қарши курашувчи бошқа идоралар, жумладан, Ҳукумат этика Агентлиги билан ҳамкорлиги каби мавзулар доирасида кечди. Шунингдек, хорижий мамлакатларнинг давлат хизматчилари учун стажировка ва тадқиқот дастурлари масаласига ҳам алоҳида эътибор қаратилди. 

Мулоқот мобайнида АҚШ Федерал суд маркази билан ҳамкорликда Ўзбекистон суд-ҳуқуқ тизими ходимлари учун давлат хизматида ҳалоллик стандартларини жорий этиш ва коррупцияга қарши курашиш ва манфаатлар тўқнашувини тартибга солиш йўналишлари  бўйича махсус курслар ва алоҳида дастурлар ишлаб чиқиш ва амалга ошириш юзасидан келишувга  эришилди.

Шунингдек, Агентлик, шу жумладан, ҳуқуқни муҳофаза қилиш идоралари ходимларини тадқиқот ҳамда амалиёт ўташга жалб қилиш масалалари атрофлича муҳокама этилди. 

Якунда Агентлик ва  Федерал судьялар маркази ўртасида 2022-2023 йилларга мўлжалланган ҳамкорлик дастурини ишлаб чиқишга келишиб олинди.

Бундан ташқари, делегация аъзолари Ўзбекистоннинг АҚШдаги элчихонасида ҳам бўлиб, мазкур ташрифнинг якунлари, эришилган натижалар ҳамда келгусидаги ҳамкорлик йўналишлари юзасидан ўзаро фикр алмашишди.

Шу билан Ўзбекистон делегациясининг АҚШга амалий ташрифи якунланди.

Коррупцияга қарши курашиш агентлиги
Ахборот хизмати