AQShga amaliy tashrifning soʻnggi kunida Oʻzbekiston delegatsiyasi hamda Qoʻshma Shtatlarning Federal sud markazi rahbariyati oʻrtasida uchrashuv boʻlib oʻtdi.  

Maʼlumot uchun: Federal sud markazi AQSH sud tizimining tadqiqot va taʼlim agentligi hisoblanadi.

Markaz odil sudlovni samarali amalga oshirish va sud hokimiyati mustaqilligini taʼminlashga koʻmaklashadi,  sud boshqaruvini takomillashtirish yoʻllari boʻyicha tanqidiy va tahliliy oʻrganishlar olib boradi. 

2021-yilda Agentlik va AQSH Federal sud markazi oʻrtasida uchrashuv boʻlib oʻtgan va unda tomonlar kelgusida hamkorlik boʻyicha kelishuvga erishishgan.

Uchrashuvda taʼkidlanganidek, Federal sud markazi sud tizimi uchun sud boshqaruvi, ishlarni boshqarish, byudjet va moliya, inson resurslari va sud-ekspertiza texnologiyalari kabi keng koʻlamli sohalarda oʻqitish va tadqiqot ishlarini olib boradi. Markaz sudyalar va boshqa sud tizimi xodimlari uchun kasbiy yoʻnalish va uzluksiz taʼlim dasturlarini tayyorlaydi. 

Shunga koʻra, tomonlar oʻrtasidagi  muloqot AQShda sudyalarni odob-ahloq va korrupsiyaga qarshi oʻqitish tizimi, Markazning korrupsiyaga qarshi kurashuvchi boshqa idoralar, jumladan, Hukumat etika Agentligi bilan hamkorligi kabi mavzular doirasida kechdi. Shuningdek, xorijiy mamlakatlarning davlat xizmatchilari uchun stajirovka va tadqiqot dasturlari masalasiga ham alohida eʼtibor qaratildi. 

Muloqot mobaynida AQSH Federal sud markazi bilan hamkorlikda Oʻzbekiston sud-huquq tizimi xodimlari uchun davlat xizmatida halollik standartlarini joriy etish va korrupsiyaga qarshi kurashish va manfaatlar toʻqnashuvini tartibga solish yoʻnalishlari  boʻyicha maxsus kurslar va alohida dasturlar ishlab chiqish va amalga oshirish yuzasidan kelishuvga  erishildi.

Shuningdek, Agentlik, shu jumladan huquqni muhofaza qilish idoralari xodimlarini tadqiqot hamda amaliyot oʻtashga jalb qilish masalalari atroflicha muhokama etildi. 

Yakunda Agentlik va  Federal sudyalar markazi oʻrtasida 2022-2023-yillarga moʻljallangan hamkorlik dasturini ishlab chiqishga kelishib olindi.

Bundan tashqari, delegatsiya aʼzolari Oʻzbekistonning AQShdagi elchixonasida ham boʻlib, mazkur tashrifning yakunlari, erishilgan natijalar hamda kelgusidagi hamkorlik yoʻnalishlari yuzasidan oʻzaro fikr almashishdi.

Shu bilan Oʻzbekiston delegatsiyasining AQShga amaliy tashrifi yakunlandi.

Korrupsiyaga qarshi kurashish agentligi
 Axborot xizmati