Давлатимиз раҳбарининг жорий йил 27 апрелдаги Ўзбекистон Республикаси Президенти “Божхона маъмуриятчилигини янада такомиллаштириш бўйича қўшимча чора-тадбирлар тўғрисида”ги Фармонида божхона органларини коррупциядан холи тизимга айлантиришга қартилган бир қатор устувор мақсад-вазифалар белгилаб берилди. 

Жумладан, Фармон билан божхона органи ходимларини коррупцияга қарши курашиш, манфаатлар тўқнашувининг олдини олиш, одоб-аҳлоқ қоидалари ва IT-технологиялар, телекоммуникациялар бўйича ўқув курсларида ўқитиш режа-жадвали тасдиқланди ва унда Коррупцияга қарши курашиш агентлиги мазкур ўқув курсларини ташкил этиш ва ўтказишга масъул давлат органларидан бири сифатида қайд этилди. 

Фармон ижроси юзасидан  жорий йилнинг 11 май куни Агентлик масъул ходимлари иштирокида Миллий кинология марказида сайёр ўқув машғулоти ўтказилди. 

Унда марказ ходимлари ҳамда тингловчиларига Фармондан ўрин олган мақсад-вазифалар, хусусан, божхона тизимида коррупциянинг олдини олиш ва унга қарши курашиш тизимида амалга оширилиши лозим бўлган чора-тадбирлар ва улардан кутилаётган натижалар хусусида батафсил маълумот берилди. 

Шунингдек, республикамизда коррупцияга қарши курашиш борасида амалга оширилаётган ислоҳотлар, янги жорий этилаётган механизмлар ва қонунчиликдаги янгиликлар тўғрисида алоҳида тўхталиб ўтилди.

Давлат хизматида ҳалолликни таъминлаш масаласи ҳам иштирокчиларнинг эътибор марказида бўлди. 

Коррупцияга қарши курашиш агентлиги 
Ахборот хизмати